İran İslam İnqilabı Keşikçiləri Korpusu (SEPAH) ABŞ-ın regiondakı hərbi varlığına qarşı genişmiqyaslı hərbi əməliyyatlara start verməyə hazırlaşdığını bəyan edib.

Kainat.tv "Tasnim"ə istinadən xəbər verir ki, Tehran rəsmi Vaşinqtonun son günlər İran ərazisinə endirdiyi intensiv zərbələrə cavab olaraq, regionda yerləşən Amerika hərbi bazalarına qarşı kütləvi hücum planı hazırlayıb.

Bu gərginlik ABŞ Mərkəzi Komandanlığının (CENTCOM) İrandakı 80-dən çox hədəfi, o cümlədən hava hücumundan müdafiə sistemlərini, radar stansiyalarını və idarəetmə mərkəzlərini məhv etməsindən dərhal sonra daha da kritik həddə çatıb.

İranın hərbi rəhbərliyi artıq bölgədəki bütün ABŞ obyektlərini, xüsusilə Bəhreyn və Küveytdə yerləşən bazaları "legitim hədəf" elan edib. Rəsmi Tehran bildirib ki, atəşkəs rejiminin ABŞ tərəfindən kobud şəkildə pozulması və İranın suverenliyinə edilən hücumlar cavabsız qalmayacaq. Artıq bəzi məlumatlara görə, İraqın şimalındakı Əl-Hərir aviabazasına edilən hücum və Bəhreyndəki Amerika hərbi donanmasına qarşı dronlardan istifadə olunması bu "kütləvi hücum" strategiyasının ilkin mərhələləri kimi qiymətləndirilir.

ABŞ rəhbərliyi isə öz növbəsində geri çəkilmək niyyətində olmadığını vurğulayır. Vaşinqton bu zərbələrin Hörmüz boğazında naviqasiya azadlığını və beynəlxalq ticarəti qorumaq üçün zəruri olduğunu qeyd edərək, İranın hərbi potensialının neytrallaşdırılması istiqamətində əməliyyatları davam etdirəcəyini bildirib. Hazırda regionda vəziyyət ifrat dərəcədə gərgindir və beynəlxalq müşahidəçilər tərəflərin atacağı növbəti addımların genişmiqyaslı regional müharibəyə çevrilə biləcəyindən ciddi narahatlıq keçirirlər. //Musavat.com