Ermənistanda seçki qanunvericiliyində edilən son dəyişikliklər konstitusiya referendumu ətrafında yeni müzakirələrə səbəb olub.

Kainat.tv Musavat.com-a istinadən xəbər verir ki, Ermənistan parlamenti xaricdə yaşayan vətəndaşların ölkə xaricindən səs verməsini qadağan edib.

Yeni qaydalara əsasən, parlament seçkilərində və referendumlarda yalnız son 730 günün ən azı 366 gününü Ermənistanda daimi yaşayan vətəndaşlar iştirak edə biləcəklər. Bu tələb növbəti parlament seçkilərinə 48 gün, növbədənkənar seçkilərə isə 28 gün qalmış yerinə yetirilməlidir.

Dəyişiklik müəlliflərinin sözlərinə görə, uzun müddət xaricdə yaşayan vətəndaşlar çox vaxt ölkədaxili siyasi vəziyyət barədə kifayət qədər məlumatlı olmur və ya yaşadıqları dövlətin siyasi gündəminin təsiri altında qala bilirlər.

Böyük ehtimalla, Paşinyanın bu addımı yaxın vaxtlarda keçirilməsi gözlənilən konstitusiya referendumu zamanı xaricdən mümkün siyasi təsirlərin qarşısını almağa hesablanıb. Bu yanaşmaya görə, xüsusilə Rusiya, ABŞ və Avropa ölkələrində yaşayan ermənilər arasında konstitusiya dəyişikliklərinə, o cümlədən Azərbaycana və Türkiyəyə qarşı ərazi iddiaları ilə bağlı müddəaların Konstitusiyadan çıxarılmasına ciddi müqavimət mövcuddur.

Bu ehtimala əsasən, Paşinyan hesablayır ki, xaricdə yaşayan Ermənistan vətəndaşlarının əhəmiyyətli hissəsi Rusiyanın və diaspor təşkilatlarının siyasi-informasiya təsiri altında referendumda dəyişikliklərin əleyhinə səs verə bilər. Məhz buna görə də səsvermə hüququnun əsasən Ermənistanda daimi yaşayan vətəndaşlarla məhdudlaşdırılması konstitusiya islahatlarının referendum yolu ilə qəbulunu asanlaşdırmağa yönəlmiş addım kimi qiymətləndirilir.

Bu yanaşmaya görə, Paşinyan parlamentdə konstitusiya çoxluğunu təmin edə bilmədiyi üçün referendum keçirmək məcburiyyətindədir və referendumun uğurlu nəticələnməsi məqsədilə xaricdə yaşayan seçicilərin prosesə təsir imkanlarını minimuma endirməyə çalışır. Xüsusilə də Ermənistanda bir ildən az yaşayan vətəndaşların səsvermədən kənarda qalması bu məqsədə xidmət edən mexanizmlərdən biri kimi qiymətləndirilir.

Bu ehtimala görə, Ermənistan hakimiyyəti əvvəlki parlament seçkiləri zamanı xaricdən seçicilərin cəlb olunması ilə bağlı müzakirələrdən nəticə çıxararaq bu dəfə daha ehtiyatlı davranıb və Kremlin konstitusiya dəyişikliklərinə təsir göstərmək imkanlarını məhdudlaşdırmaq məqsədilə seçki qanunvericiliyində dəyişiklik edib.

Paşinyanın əsas hədəfinin konstitusiyadan Azərbaycana və Türkiyəyə qarşı ərazi iddiaları ilə bağlı müddəaların çıxarılmasına nail olmaq və bunun üçün referendumun daha rahat keçirilməsini təmin etmək olduğu ehtimal edilir.