Türkiyənin paytaxtı Ankara şəhərində keçirilən və qlobal təhlükəsizlik memarlığı baxımından böyük maraqla gözlənilən tarixi NATO sammiti yekun bəyannamənin qəbul edilməsi ilə başa çatıb. İttifaq azad və demokratik dövlətlərin birliyi olaraq həm kollektiv müdafiə prinsiplərini yenidən təsdiqləyib, həm də gələcək hərbi və iqtisadi yol xəritəsini müəyyən edib.

Kainat.tv xəbər verir ki, alyansın qəbul etdiyi rəsmi Ankara bəyannaməsində Ukrayna cəbhəsinə yönəlmiş irimiqyaslı maliyyə dəstəyi təsdiqini tapıb. Sənədə əsasən, NATO-ya üzv olan ölkələr rəsmi Kiyevə təkcə 2026-cı il ərzində 70 milyard avro həcmində növbəti hərbi-iqtisadi yardım ayırmaq barədə hüquqi öhdəlik götürüblər. Bəyannamədə Rusiya Federasiyasının hərbi ambisiyaları kəskin tənqid olunaraq, Moskvanın bütün avro-atlantik məkandakı icma üçün "uzunmüddətli təhlükə formalaşdırdığı" rəsmən qeydə alınıb. Bu təhdidlərə qarşı müttəfiqlərin hərbi gücünü artırmaq məqsədilə sammit çərçivəsində üzv dövlətlər arasında ümumi dəyəri 50 milyard dollar təşkil edən yeni irimiqyaslı hərbi müqavilələr və silah tədarükü sazişləri imzalanıb.

Sənədin digər mühüm hissəsi isə son günlər neft bazarlarını alt-üst edən Yaxın Şərqdəki İran böhranına həsr olunub. Müttəfiqlər rəsmi Tehrana xəbərdarlıq edərək, İranın heç bir halda nüvə silahına sahib olmamalı barədə ortaq mövqeyi yenidən bəyan ediblər, həmçinin Tehran rejimini qlobal dəniz ticarəti və enerji təhlükəsizliyi üçün kritik olan Hörmüz boğazında gəmilərin sərbəst hərəkət azadlığına (naviqasiya hüququna) tam şəkildə hörmətlə yanaşmağa çağırıblar. Bəyannamənin yekununda alyansın əsas təməli olan kollektiv təhlükəsizlik prinsipi xüsusi vurğulanıb: "Birimizə edilən hücum hamımıza edilmiş hücum deməkdir. Bizim birliyimiz, həmrəyliyimiz və kollektiv gücümüz azad və demokratik dövlətlərdən ibarət alyansımızın bir milyard vətəndaşı üçün sülhün, təhlükəsizliyin və rifahın əsası olaraq qalır. Biz bundan sonra da '360 dərəcəlik' qlobal çəkindirmə və müdafiə strategiyamıza sadiq qalacağıq". //Musavat.com