DÇ-2026 futbol tarixinin ən möhtəşəm və ən genişmiqyaslı turniri kimi yadda qalacaq. Belə ki, dünyanın ən populyar idman yarışının sayca 23-cü final mərhələsi olan bu mundial bir sıra yeniliklərlə futbol tarixində yeni səhifə açacaq. İlk dəfə olaraq dünya çempionatı üç ölkənin birgə ev sahibliyi ilə keçiriləcək, iştirakçı komandaların sayı rekord həddə çatacaq və oyunların ümumi sayı əvvəlki mundiallarla müqayisədə kəskin artacaq.
Yarış iyunun 11-dən iyulun 19-dək ABŞ, Kanada və Meksikada keçiriləcək. Bununla da ilk dəfə üç dövlət eyni vaxtda mundiala ev sahibliyi etmiş olacaq. Meksika daha bir rekordun müəllifinə çevriləcək. Belə ki, bu ölkə 1970 və 1986-cı illərdən sonra üçüncü dəfə dünya çempionatına ev sahibliyi edən ilk dövlət olacaq. ABŞ ikinci dəfə (1994-dən sonra), Kanada isə tarixində ilk dəfə mundial oyunlarını qəbul edəcək.
Dünya çempionatlarının tarixi barədə məlumat verək:
İlk dünya çempionatı 1930-cu ildə Uruqvayda təşkil olunub. O vaxtdan bəri keçirilən turnirlər futbolun ən nüfuzlu yarışı hesab edilir. Yuxarıda qeyd etdiyimiz kimi, 2026-cı il mundialı sayca 23-cü Dünya Çempionatı olacaq.
İndiyədək ən çox dünya çempionu adını Braziliya qazanıb, 5 dəfə. Almaniya və İtaliya 4, Argentina 3, Fransa və Uruqvay 2, İngiltərə və İspaniya isə 1 dəfə dünya çempionu olub.
2026 mundialının ən mühüm yeniliyi iştirakçı sayının artırılmasıdır.
1998-ci ildən etibarən dünya çempionatlarında 32 komanda iştirak edirdi. FİFA-nın qərarı ilə 2026-cı ildən etibarən iştirakçıların sayı 48-ə çatdırılıb.
Komandalar 12 qrupa bölünəcək. Hər qrupda 4 ölkə mübarizə aparacaq.
Qrup mərhələsindən, 12 qrup qalibi, 12 ikinci yer sahibi və ən yaxşı nəticə göstərən 8 üçüncü yer sahibi olmaqla ümumilikdə 32 komanda pley-off mərhələsinə yüksələcək.
Bunun ardınca 1/16 final, 1/8 final, 1/4 final, yarımfinal və final oyunları keçiriləcək.
Yeni sistem nəticəsində mundialda ümumilikdə 104 oyun baş tutacaq. Bu isə əvvəlki turnirlərdəki 64 oyundan xeyli çoxdur.
2026 Dünya Çempionatı 16 şəhərdə təşkil olunacaq.
ABŞ: Nyu-York / Nyu-Cersi, Los-Anceles, Dallas, Hyuston, Atlanta, Boston, Filadelfiya, Mayami, Sietl, Kanzas-Siti və San-Fransisko Körfəz bölgəsi
Kanada: Toronto, Vankuver
Meksika: Mexiko, Qvadalaxara, Monterrey
Final oyununun ABŞ-ın Nyu-Cersi ştatındakı MetLife Stadionunda keçirilməsi planlaşdırılıb.
2026 Dünya Çempionatında 48 milli mübarizə aparacaq.
Turnirə vəsiqə qazanan komandalar arasında aşağıdakılar yer alır:
Avropa (UEFA)
İngiltərə, Fransa, Almaniya, İspaniya, Portuqaliya, Hollandiya, Belçika, Xorvatiya, Türkiyə, Avstriya, İsveç, İsveçrə, Şotlandiya, Çexiya, Norveç və Bosniya-Hersoqovina.
Cənubi Amerika (CONMEBOL)
Argentina, Braziliya, Uruqvay, Kolumbiya, Ekvador və Paraqvay.
Asiya (AFC)
Yaponiya, Cənubi Koreya, İran, Səudiyyə Ərəbistanı, Avstraliya, Qətər, İordaniya, İraq və Özbəkistan.
Afrika (CAF)
Mərakeş, Misir, Əlcəzair, Seneqal, Qana, Fil Dişi Sahili, Tunis, Konqo DR,
Cənubi Afrika və Kabo-Verde.
Şimali və Mərkəzi Amerika (CONCACAF)
ABŞ, Kanada, Meksika, Panama, Haiti və Kurasao.
Okeaniya (OFC)
Yeni Zelandiya.
2026 mundialı bir neçə mühüm rekorda imza atacaq:
İlk dəfə üç ölkə ev sahibi olacaq;
İlk dəfə 48 komanda iştirak edəcək;
İlk dəfə 104 oyun keçiriləcək;
Finala yüksələn komanda 8 oyun keçirməli olacaq;
Dünya çempionatı tarixinin ən uzun turnirlərindən biri olacaq;
FİFA tarixində ən böyük kommersiya və media layihəsinə çevriləcək.
Mütəxəssislərin fikrincə, turnirin əsas favoritləri aşağıdakılardır:
Argentina (hazırkı dünya çempionu)
Braziliya
Fransa
İspaniya
İngiltərə
Almaniya
Portuqaliya
Bununla yanaşı Mərakeş, Türkiyə, Yaponiya, ABŞ və Kolumbiya kimi komandaların sürpriz nəticələr göstərə biləcəyi ehtimal edilir. Qeyd edək ki, futbolsevərlər Lionel Messi və Kriştiano Ronaldonun son dünya çempionatı ola biləcək bu turnirə xüsusi maraq göstərirlər.
Azərbaycan millisi hələlik dünya çempionatının final mərhələsinə vəsiqə qazanmayıb. Bununla belə ölkəmizdə milyonlarla futbol azarkeşi mundialı böyük maraqla izləyir. Xüsusilə Türkiyə millisinin iştirak etməsi Azərbaycan futbolsevərlərinin diqqətini daha da artırır. Bu baxımdan Türkiyənin oyunlarının vaxtı maraq göstərir. "Ay-ulduzlular" qrupda ABŞ, Paraqvay və Avstraliya ilə mübarizə aparacaq.
Oyunların ardıcıllığı bu cürdür:
14 iyun08:00. Avstraliya – Türkiyə
20 iyun
07:00. Türkiyə – Paraqvay
26 iyun
06:00. Türkiyə – ABŞ
Oyunların başlama saatı Bakı vaxtı ilə göstərilib.
Bu Dünya Çempionatı yalnız futbol yarışı deyil, həm də qlobal miqyasda milyardlarla insanı bir araya gətirəcək möhtəşəm idman festivalı olacaq. Yeni format, rekord sayda iştirakçı, üç ölkənin ev sahibliyi və dünyanın ən güclü futbolçularının mübarizəsi bu turniri futbol tarixinin ən yaddaqalan mundiallarından birinə çevirməyə namizəddir.
