Rusiyada bir müddətdir davam edən yanacaq böhranı artıq kosmik peyklər tərəfindən qeydə alınacaq dərəcədə kəskinləşib.

Kainat.tv BBC-yə istinadən xəbər verir ki, ölkənin müxtəlif bölgələrindəki yanacaqdoldurma məntəqələrində yaranan nəhəng tıxaclar kosmosdan aydın şəkildə seçilir.

"BBC Verify" (Faktların yoxlanılması xidməti) "Airbus" peykindən çəkilən son görüntüləri təhlil edərək Transbaykal diyarının Atamanovka qəsəbəsi yaxınlığındakı yanacaqdoldurma məntəqəsində yaranan çoxkilometrlik növbəni aşkarlayıb. Peyk məlumatları üzrə ekspert Pol Braunun bildirdiyinə görə, iyulun 3-ü səhər saatlarında çəkilən fotoda "Rosneft" şirkətinə məxsus məntəqəyə doğru uzanan yüzlərlə maşın karvanı görünür. Sosial şəbəkələrdə geniş yayılan videoqeydlər də bu acınacaqlı mənzərəni təsdiqləyir. İyulun 2-də lentə alınan videoda növbənin uzunluğunun təxminən 4,5 kilometrə çatdığı və orada ən azı 635 avtomobilin saatlarla yanacaq gözlədiyi əks olunub.

Hazırda bu böhran coğrafiyasını daha da genişləndirir. BBC ekspertləri artıq Rusiyanın 13 regionunda, o cümlədən paytaxt Moskva və Moskva vilayətində bənzər yanacaq növbələrini əks etdirən çoxsaylı videoların reallığı əks etdirdiyini təsdiqləyiblər.

Vəziyyətin getdikcə pisləşməsi fonunda yanacaqdoldurma məntəqələrində ciddi asayiş problemləri yaranmağa başlayıb. Münaqişələrin və xaotik mühitin qarşısını almaq məqsədilə bəzi regionlarda YDM-lərin mühafizəsinə polis qüvvələri, kazaklar və hətta millətçi təmayüllü "Rus İcması" ("Russkaya Obşina") təşkilatının nümayəndələri də cəlb edilib. //Musavat.com