İsrailin “Ynet” nəşrində dərc olunan məqalədə Türkiyə ilə İsrail arasında artan rəqabətin artıq diplomatik gərginlik çərçivəsini aşaraq geosiyasi və iqtisadi mübarizəyə çevrildiyi iddia olunub.

Kainat.tv Publika.az-a istinadən xəbər verir ki, təhlilə əsasən, gələcəkdə təkcə enerji resursları deyil, ticarət marşrutları və məlumat axını da qlobal güc balansını müəyyən edəcək.

Nəşrə görə, bu mübarizədə qalib gələn tərəf dünya ticarət yollarına nəzarətdə üstünlük qazanacaq.

Həmçinin iddia edilib ki, Türkiyənin İsraillə mümkün qarşıdurmaya hazırlaşdığına dair əlamətlər var və belə bir ssenaridə ən ehtimal olunan qarşıdurma məkanı Suriya ola bilər.

Məqalədə ABŞ-ın dəstəklədiyi Hindistan-Yaxın Şərq-Avropa İqtisadi Dəhlizi (IMEC) layihəsinin qlobal iqtisadiyyat üçün strateji əhəmiyyət daşıdığı da vurğulanıb. İddia edilib ki, Türkiyə də bu yeni geoiqtisadi sistemdən kənarda qalmaq istəmir və İsraildən yan keçən alternativ logistika marşrutları üzərində çalışır.

Təhlildə vurğulanıb ki, İsrail limanları üzərindən keçən marşrutla Türkiyə və Suriya üzərindən uzanan quru dəhlizləri arasındakı rəqabət gələcək qlobal güc balansına təsir göstərəcək.

Bununla yanaşı, Afrika buynuzu regionunda, xüsusilə Somali və Somaliland istiqamətində Türkiyə ilə İsrail arasında strateji rəqabətin gücləndiyini də qeyd olunub.