Almaniya kansleri Fridrix Merts Ukraynadakı münaqişənin mümkün həlli barədə danışıb .

Kainat.tv Publika.az-a istinadən xəbər verir ki, G7 sammitindəki məsləhətləşmələr zamanı iştirakçılar Ukraynadakı münaqişəni müzakirə ediblər. Merts bildirib ki, indi "ilk dəfə olaraq sülh üçün şans açılır".

“Yenilik odur ki, bütün G7 tərəfdaşları vəziyyətin qiymətləndirilməsində vahid mövqedədirlər. Hesab edirəm ki, bu, çox yaxşı xəbərdir, çünki son günlərdə və həftələrdə müharibə yeni bir təkan qazanıb. İlk dəfə olaraq sülh üçün bir şans açılır”, - Merts bildirib.

Fransanın Evian-le-Ben şəhərində keçirilən sammitdə Merts əlavə edib ki, G7 tərəfdaşları bu fürsətdən birgə istifadə etmək istəyirlər. O, ABŞ prezidenti Donald Tramp da daxil olmaqla, müzakirələrin ona "müəyyən dərəcədə nikbinlik" verdiyini aydınlaşdırıb.

Merts həmçinin Rusiya ilə münasibətlərə də toxunub və Berlinin Moskva ilə dialoqu bərpa etməyə hazır olduğunu bildirib:

“Biz danışıqlara hazırıq və mənim fikrimcə, avropalıların bu formatda danışıqlar masasında oturması tamamilə təbiidir".