ABŞ Prezidenti Donald Tramp İranla bağlı mümkün yeni addımları müzakirə etmək üçün Ağ Evin Situasiya Otağında müşavirə keçirib.

Kainat.tv Musavat.com-a istinadən xəbər verir ki, Axios-un jurnalisti Barak Ravidin məlumatına görə, Tramp bu axşam Ağ Evin Situasiya Otağında yüksək səviyyəli iclas keçirərək İrana qarşı mümkün əlavə zərbələri müzakirə edib.

Mənbələrin bildirdiyinə görə, Trampın nəzərdən keçirdiyi variantlardan biri İranı danışıqlarda mövqeyini dəyişməyə məcbur etmək məqsədi daşıyan genişmiqyaslı, lakin qısa müddətli hərbi əməliyyatdır. Lakin bu planla bağlı əlavə təfərrüatlar açıqlanmayıb.

Məlumata əsasən, Qətər vasitəçiləri çərşənbə günü Tehranda İran rəsmiləri ilə görüş keçirərək ABŞ və İran arasında son həftələrdə aparılan danışıqlara yenidən təkan verməyə çalışıblar.

Qeyd olunur ki, əgər yaxın vaxtlarda diplomatik irəliləyiş əldə olunmasa, ABŞ tərəfindən İrana qarşı yeni hərbi zərbələr endirilə bilər.

Bununla yanaşı, amerikalı jurnalist, Pulitzer mükafatı laureatı Seymur Herş mənbəyə istinadən yazıb ki, Donald Trampın administrasiya üzvləri ilə İrana qarşı nüvə silahından istifadə ehtimalını da müzakirə etdiyi iddia olunur.

Məlumata görə, Ağ Evdə keçirilən məxfi görüşlərin birində Tramp münaqişənin daha tez başa çatdırılması üçün belə variantın nə dərəcədə mümkün olması ilə maraqlanıb. Herş qeyd edib ki, söhbət nüvə silahından istifadəyə dair qərardan deyil, mümkün ssenarilərin qiymətləndirilməsindən gedir. Ağ Ev və ABŞ administrasiyası tərəfindən bu iddialarla bağlı hələlik rəsmi açıqlama verilməyib.

Eyni zamanda, ABŞ Müharibə naziri Pit Heqset bəyan edib ki, Vaşinqton bu gecə İran ərazisinə qarşı hücumları daha da gücləndirəcək. Onun sözlərinə görə, əməliyyatların əsas hədəfi İranın mühüm infrastruktur obyektləri olacaq.

Heqset bildirib ki, ABŞ İran üzərinə təzyiqi artırmaq niyyətindədir və qarşıdakı əməliyyatlar əvvəlkilərdən daha genişmiqyaslı ola bilər. ABŞ Prezidenti Donald Tramp da daha əvvəl İrana qarşı yeni zərbələrin endiriləcəyini açıqlamışdı.