Gürcüstanın Avropa İttifaqına (Aİ) üzvlük danışıqlarının 2028-ci ilə qədər dayandırılması və qrantlardan imtina etməsindən sonra ölkədə vəziyyət daha da gərginləşib.

Baş nazir İrakli Kobaxidzenin məlumatı açıqlamasından sonra avrointeqrasiyanın tərəfdarı olan çox sayda vətəndaş küçələrə axışıb. Parlament binasının qarşısında günlərdir davam edən aksiyalar daha da şiddətlənib. Etirazçılara hüquq-mühafizə orqanları arasında qarşıdurma yaşanıb.

Hakim Gürcü Arzusu Partiyasının qərarından sonra yaşananlar hökumət üçün nə vəd edir?

Kainat.tv xəbər verir ki, Globalinfo.az-a danışan politoloq Qabil Hüseynli deyib ki, Kobaxidzenin bəyanatlarından asılı olmayaraq hazırkı vəziyyətdə nəticə dəyişməyəcəkdi:

“Yəni Qərb Gürcüstanda rəngli inqilab ssenarisini yenə də aktivləşdirəcəkdi. Məsələ ondadır ki, bu ölkədəki seçkilərin nəticələri Qərbin maraqlarına qətiyyən uyğun deyil. Ümumiyyətlə, ABŞ və Qərb hazırkı gürcü hakimiyyətini ruspərəstlikdə ittiham edir. Bu faktın özü belə mövcud vəziyyətin pərdəarxası məqamlarını göstərir.

Hazırda  Gürcüstanda baş verən proseslər vaxtilə Ukraynada yaşanıb. Həmçinin 2018-ci ildə Nikol Paşinyanın Ermənistanda hakimiyyətə gəlməsi ilə nəticələnən proseslərlə də eynilik təşkil edir. Fikrimcə, bu baxımdan Kobaxidzenin bəyanatları sadəcə prosesi sürətləndirəcək və hazırkı etaba gətirəcək təkanverici məqamdır”.