ABŞ administrasiyası Əlcəzairin Rusiyadan qırıcı təyyarələr alması səbəbindən bu ölkəyə qarşı sanksiyaların tətbiqi imkanlarını nəzərdən keçirir.

Kainat.tv Publika.az-a istinadən xəbər verir ki, bu barədə ABŞ Dövlət Departamentinin Yaxın Şərq məsələləri üzrə bürosunun rəhbəri Robert Palladino məlumat verib.

Senatda keçirilən dinləmələr zamanı senatorun sualını cavablandıran diplomat təsdiqləyib ki, bu növ hərbi sövdələşmələr Vaşinqtonda ciddi narahatlıq doğurur.

Palladino vurğulayıb ki, Dövlət Departamenti "Amerikanın rəqiblərinə sanksiyalar vasitəsilə müqavimət göstərilməsi haqqında qanun"un (CAATSA) tələblərinə əməl olunmasını təmin etmək öhdəliyi daşıyır. Onun sözlərinə görə, Rusiyadan hərbi texnika alışı kimi iri maliyyə əməliyyatları birbaşa məhdudlaşdırıcı tədbirlərin görülməsinə səbəb ola bilər.

"Biz bu məsələləri diqqətlə izləyirik və qanunvericiliyin tələblərindən irəli gələn addımların atılması istisna deyil", - deyə diplomat qeyd edib.

ABŞ rəsmisi həmçinin əlavə edib ki, Vaşinqton Əlcəzair hökuməti ilə müxtəlif razılaşmalar üzərində sıx işləyir. Bununla belə, hərbi satınalmalar da daxil olmaqla bir çox strateji mövzularda tərəflər arasında hələ də ciddi qeyri-müəyyənliklər və "açıq qalmış məqamlar" mövcuddur.