"Turan" İnformasiya Agentliyi fəaliyyətini dayandırır.
Musavat.com-un məlumatına görə, bu barədə agentliyin saytında müraciət dərc olunub.
Agentliyin direktoru Mehman Əliyevin kollektiv adından yaydığı müraciətdə bildirib ki, "Turan" İA mövcud formatda fəaliyyətini maliyyə çətinlikləri ilə bağlı dayandırır.
 “Otuz ildən artıq bir müddətdə Turan İnformasiya Agentliyi Azərbaycanda müstəqil jurnalistikanın dayağı olub, siyasi və iqtisadi qeyri-sabitlik şəraitində obyektiv və etibarlı xəbərlər təqdim edib. 1990-cı ildə - Sovet İttifaqının son günlərində yaradılan agentliyimiz, keçid dövrünün çətinliklərindən, müharibə və islahatlar dövrlərindən keçərək ictimai maraqları qorumağa sadiq qalıb.
Lakin bu gün qaçılmaz bir reallıqla üzləşirik: daimi maliyyə çətinlikləri səbəbindən informasiya fəaliyyətimizi hazırkı formatda davam etdirmək mümkün deyil. Davam etmək üçün zəruri resursları təmin etmək yolunda dayanmadan göstərdiyimiz səylərə baxmayaraq, bizi uzun illər təqib edən maliyyə çətinlikləri nəhayət agentliyin fəaliyyətini mövcud formatda dayandırmaq barədə ağır qərar qəbul etməyə məcbur etdi.
Bu, bizim missiyamızın sonu deyil, əksinə, yeni bir inkişaf mərhələsidir. İnformasiya məkanı sürətlə dəyişir və biz də bu dəyişikliklərə uyğunlaşmağın vacibliyini anlayırıq. Qarşıdakı aylarda biz xəbər yayımı ilə yanaşı, dünyanın, regionun və ölkəmizin proseslərini təhlil edən, əsas problemləri müəyyən edib həll yolları təklif edən yeni bir format üzərində işləyəcəyik. Müasir jurnalistikanın gələcəyi təkcə xəbər vermək deyil, həm də ictimai rəyi formalaşdırmaqdır. 
Sizə - oxucularımıza - bizə göstərdiyiniz etimad və dəstəyə görə dərin minnətdarlığımızı bildiririk. Sizin marağınız və iştirakınız bizim fəaliyyətimizin əsas hərəkətverici qüvvəsi olub və biz bu yolda sizinlə yeni və daha mənalı şəkildə davam edəcəyimizə ümid edirik. Biz hazırkı modeldən geri çəkilsək də, əsas məqsədimizdən - mürəkkəbləşən dünyanı anlamağa kömək edən müstəqil səs olmaqdan imtina etmirik.
Turanın hekayəsi hələ bitməyib. Bizimlə qalın”.