Rüşvət almaqda ittiham edilərək həbs edilən sabiq vəzifəli şəxslər növbəti dəfə hakim qarşısına çıxarılacaq. Bəraət alan Dəyanət Atakişiyev və Ayxan Səfərov bu dəfə Ali Məhkəmədə hakim önündə olacaq.

Kainat.tv xəbər verir ki, prokuror hər iki şəxs barəsində hökmdən kassasiya protestləri verib.

İşə Ali Məhkəmədə hakim İlqar Qılıcovun sədrliyi ilə mayın 22-də baxılacaq.

Hər iki şəxs Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestri Publik Hüquqi Şəxsin əməkdaşları olub. Ayxan Səfərov 6 saylı Beyləqan ərazi idarəsinin sabiq rəisi, Dəyanət Atakişiyev isə Arxiv şöbəsinin sabiq müdiri olub.

Onlar Beyləqan rayonunda yerləşən kənd təsərrüfatı təyinatlı torpaqlara dair mülkiyyət hüququnu təsdiq edən sənədin verilməsi üçün rüşvət almaqda təqsirləndiriliblər.

İstintaq dövründə Ayxan Səfərov və Dəyanət Atakişiyevə Cinayət Məcəlləsinin 308.1 (vəzifə səlahiyyətlərindən sui-istifadə), 311.3.2 (təkrar rüşvət alma) və 32.5, 311.3.2-ci (təkrarən rüşvət almaqda köməkçilik etmə) maddələri ilə ittiham elan edilməklə həbs edilmişdilər.
Lənkəran Ağır Cinayətlər Məhkəməsi hər iki şəxsin qeyd edilən ittihamla günhakar olmaması qənaətinə gəlib və onlar barəsində bəraət hökmü çıxarıb. Apelyasiya məhkəməsi də qərarı qüvvədə saxlayıb.
Musavat.com