Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin cinayət işi üzrə növbəti məhkəmə prosesi keçirilib.

Kainat.tv Teleqraf.com-a istinadən xəbər verir ki, Bakı Hərbi Məhkəməsində hakim Fikrət Əliyevin sədrliyi ilə keçirilən prosesdə zərərçəkmiş qismində tanınmış Maliyyə Nazirliyinin hüquqi nümayəndəsinin iştirakı etmədiyi məlum olub. Dövlət ittihamçısı Maliyyə Nazirliyin nümayəndəsinin məhkəmənin hazırkı mərhələlərində iştirakının təmin olunmasının vacib olduğunu deyib.

Onun sözlərinə görə, zərərçəkmişin hüquqi nümayəndəsinin mövqeyi vacibdir.

Hakimlərin qərarına görə, hazırkı mərhələdə zərərçəkmişin nümayəndəsinin iştirakı olmadan proses davam etdirilib, növbəti iclasda isə iştirakı təmin olunacaq.

Daha sonra hakim deyib ki, dövlətə vurulmuş ziyanın ödənilməsinin məbləği ilə bağlı istintaq orqanına sorğu göndərilib və Dövlət Təhlükəsizliyi Xidmətinin İstintaq baş idarəsindən sorğuya cavab verilib.

Cavabda göstərilib ki, bu günə kimi dövlətə vurulmuş ziyanla bağlı ümumilikdə 38 milyon 664 min manat ödəniş olunub. Həmin məbləğdən Nizami Məmmədov 12 milyon 203 min manat, Vüsal Əlizadə 101 min manat, Cəlal Kazımov isə 110 min manat ödəniş edib.

Bundan başqa, iş üzrə bütün təqsirləndirilən şəxslərin əmlaklarına ziyanın ödənilməsinə yönəldilməsi üçün həbs qoyulub.

Daha sonra Nizami Məmmədovun vəkili Rəşad Mirmehdizadə bildirib ki, Maliyyə və Büdcə İdarəsində baş mühasib işləmiş Akif Umudov Nizami Məmmədovun əvəzindən 210 min manat dövlət büdcəsinə ödəniş edib, amma həmin məbləğ ziyanın ödənilməsi ilə bağlı siyahıda göstərilməyib.

Vəkilin sözlərinə görə, Akif Umudov məhkəmədə ifadə verən zaman bu məbləğin ödənilməsini təsdiqləyib.

Bundan sonra hakim məhkəmə istintaqının tamamlanması ilə bağlı tərəflərin fikirlərini soruşub. Dövlət ittihamçısı hazırda məhkəmə istintaqının tamamlanmasına etiraz edib.

Hakim isə məhkəmə istintaqının tamamlanması barədə qərar qəbul edib və çıxış etmək üçün dövlət ittihamçısına söz verib. Dövlət ittihamçısı isə çıxışa hazırlaşmaq üçün vaxt istəyib.

Növbəti proses noyabrın 22-də davam edəcək.

Qeyd edək ki, Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi polkovnik Cəlal Kazımov, Quru Qoşunların maliyyə idarəsinin sabiq rəisi Bayram Bayramov, Hərbi Dəniz Qüvvələrinin maliyyə xidmətinin sabiq rəisi Vüsal Əlizadə, Müdafiə Nazirliyinin Satınalmalar və Təchizat İdarəsinin sabiq rəisi polkovnik Mahir Şirvanov, həmçinin nazirliyin Satınalmalar və Təchizat İdarəsinin sabiq rəisi Məlikməmməd Qurbanov, nazirliyin mənzil istismar idarəsinin sabiq rəisi polkovnik Fikrət Mirzəyev Dövlət Təhlükəsizliyi Xidmətinin keçirdiyi xüsusi əməliyyat nəticəsində həbs ediliblər.

Təqsirləndirilən şəxslər dövlət büdcəsindən ayrılan pulları mənimsəməkdə ittiham edilirlər.

Xatırladaq ki, cinayət işi üzrə ümumilikdə dövlətə dəymiş ziyan 143 milyon manatdır.

Cinayət işləri ayrı-ayrı icraatlarda baxılması üçün məhkəməyə göndərilib.

Cinayət işi üzrə Maliyyə Nazirliyi zərərçəkmiş qismində tanınıb. Təqsirləndirilən şəxslərin hər birinə Cinayət Məcəlləsinin 179.4-cü (xüsusi ilə külli miqdarda ziyan vurmaqla mənimsəmə törətmək) maddəsi ilə ittiham irəli sürülüb.