ABŞ-ın “Politico” nəşri Suriyada Bəşər Əsəd rejiminin devrilməsini Türkiyə Prezidenti Rəcəb Tayyib Ərdoğanın uğuru kimi şərh edib.

Kainat.tv xəbər verir ki, nəşrin “Əsədin süqutu: qaliblər və uduzanlar” adlı məqaləsində Suriyada baş verənlərdən ən çox qazanan ölkənin Türkiyə olduğu bildirilib.

“Qaliblərdən biri də Prezident Ərdoğandır”, - məqalədə qeyd olunub.

Qələbədə Türkiyənin payına təfərrüatları ilə toxunan “Politico” təhlilinə iqtisadçı Timoti Eşin bu fikrini də əlavə edib: “Türkiyə üçün böyük qələbə - Ərdoğanın dahiyanə həmləsi”.

ABŞ nəşri Ərdoğanın Suriya riskli oyuna getdiyini, amma istədiyi nəticə ilə bitirdiyini yazır:

“Suriyada baş verənlərin çoxu Türkiyə liderinin geosiyasi manevrləri, xüsusən də Əsədin uzun müddətdir uzlaşma təklifini rədd etməsindən narahat olması ilə bağlıdır”. //Teleqraf.com