Bir müddətdir "rusiyapərəst mövqe”dən çıxış edən Ermənistan Baş naziri Nikol Paşinyan yenidən dəyişikliyə gedib.

Kainat.tv xəbər verir ki, bu barədə Ermənistanın “Past” qəzeti yazır.

Nəşr bildirir ki, son həftələrdə Paşinyanın ritorikasında qəribə təzahürlər müşahidə olunur:

“Xüsusilə, Paşinyanın xarici siyasi vektoru dəyişmək istiqamətində atdığı addımların birdən-birə “Rusiyaya şiddətli sevgi” ilə əvəz olunduğu göründü. Çoxları belə fikirlər səsləndirdi ki, bu “rus sevgisi” uzun sürə bilməz, Qərb nə vaxtsa Paşinyana öz yerini göstərəcək, ona tapşırılanları yerinə yetirməyə başlayacaq.

Dünən Paşinyan Ermənistan-Rusiya münasibətlərinə yeni daşlar atmaqla Qərbə sevgisini ifadə etməyi bacardı. Baş nazir Rusiya Prezidenti Vladimir Putinin KTMT-nin qapılarının Ermənistanın üzünə açıq olması fikrinə cavab verərkən söylədi ki, biz artıq özümüzü KTMT-dən kənarda hesab edirik. Paşinyanın fikrincə, dönməzlik məqamı artıq keçib.

Həmçinin Ermənistan başçısı Avrasiya İqtisadi Birliyinin sammitinin Ermənistanda keçirilməsini yersiz hesab etdiyini dedi. Onun sözlərinə görə, AİB Ali İqtisadi Şurasının Ermənistan üçün arzuolunmaz üzvləri var.

Əslində, Paşinyan bu açıqlamaları ilə yenidən Qərbə mesaj verir ki, o, bütün tapşırıqları sakitcə yerinə yetirir və ona toxunmağa ehtiyac yoxdur”. //Teleqraf.com