İsrail Hərbi Hava Qüvvələrinə məxsus 50-dən çox döyüş təyyarəsi hərbi kəşfiyyatla yüksək səviyyəli koordinasiya şəraitində İranın üç müxtəlif bölgəsində yerləşən nüvə proqramı və silah istehsalı mərkəzlərinə qarşı tarixin ən böyük hava hücumlarından birini həyata keçirib.

Kainat.tv xəbər verir ki, SAXAL-ın mətbuat xidmətinin yaydığı rəsmi məlumata görə, bir neçə saat davam edən və üç ardıcıl dalğadan ibarət olan bu kütləvi əməliyyat nəticəsində İranın nüvə və hərbi sənayesinin "onurğa sütunu" hesab olunan strateji obyektlər darmadağın edilib. Vurulan hədəflər arasında nüvə silahı üçün plütonium istehsalında əvəzedilməz rol oynayan Arakdakı ağır su zavodu və uranın zənginləşdirilməsi prosesi üçün zəruri olan xüsusi partlayıcı maddələrin istehsal edildiyi Yezddəki unikal müəssisə tamamilə sıradan çıxarılıb. Hücum zamanı həmçinin İran Müdafiə Nazirliyinə məxsus, "Həmas" və "Hizbullah" kimi proksi qüvvələri müasir partlayıcı qurğularla təmin edən mərkəzi laboratoriya, ballistik raket komponentləri və zenit raketlərinin istehsal edildiyi nəhəng hərbi komplekslər bir neçə saat ərzində alovlar içində qalıb.

Qeyd olunur ki,  50-dən çox qırıcının İranın hava hücumundan müdafiə sistemlərini yararaq ölkənin dərinliklərinə sızması və strateji nüvə infrastrukturunu məhv etməsi Tehranın hərbi potensialına onilliklərlə bərpası qeyri-mümkün olan sarsıdıcı zərbə vurub. SAXAL rəsmiləri əməliyyatın bütün hədəflərinə çatdığını və bütün təyyarələrin itkisiz geri döndüyünü bəyan ediblər, rəsmi Tehran isə baş verənlərdən sonra ölkədə hərbi vəziyyəti daha da sərtləşdirib. //Musavat.com