“Bəzi məktəblər bağlanacaq və şagirdlər distant təhsilə keçəcəklər. Uşaqlar məktəbə gedib-gələndə sosiallaşır. Sinifdə 5 uşaq olsa belə, tək övladı olan ailə üçün bu, bir dəstəkdir. Hər bir uşağın sinif yoldaşları olmalıdır. Bu, onların mənəvi haqqıdır. Dəcəlliyi də birlikdə edirlər, bayramı da birlikdə keçirirlər və bu xatirələr yadda qalır. Amma distant təhsildə bunlar yoxdur”.

Axşam.az xəbər verir ki, bu sözləri aparıcı Mehman Rəsulov “Xəbər ertəsi” verilişində deyib. O, distant təhsilin uşaqlarda sosiallaşma probleminə səbəb olacağını bildirib:

“Onsuz da uşaq bütün günü evdə ana və atasını görür. Bu uşaq çölə çıxmalı, sinif yoldaşları ilə futbol, basketbol oynamalıdır. Yoxsa evdə oxu, digər otağa keç, distant təhsil al. Bu təhsilin zərəri təkcə məktəbə getməmək deyil, uşaqlar sosiallaşma problemi yaşayacaqlar”.

Aparıcı Aytən Səfərova isə fikirlərini belə ifadə edib:

“Maraqlıdır ki, qərar qəbul olunur: ‘Distant təhsilə keçsinlər’ vəssalam, imza atılır. Bəs o uşağın bu təhsilə keçməsi üçün planşeti, evində interneti varmı? Digər lazımi şərait mövcuddurmu? Bunlar necə tənzimlənəcək? Çində uşaqlar metroda da dərs oxuyurlar. Ora Çindir... Son zamanlar Azərbaycandan alim çıxıbmı? Bizim uşaqlar isə əsasən repetitor yanına gedirlər. Təhsil məsələsində hər dəfə bir yenilik olur, hansının şagird və valideynin xeyrinə olduğu isə adamı çaş-baş salır”.

Qeyd edək ki, ötən ay elm və təhsil naziri Emin Əmrullayev “Real TV”yə müsahibəsində yeni tədris ilindən şagird sayı az olan məktəblərin distant təhsilə keçiriləcəyini açıqlamışdı.



Kainat.tv