Son illər təhsil sahəsində həyata keçirilən islahatlar çərçivəsində məktəb direktorlarının imtahan yolu ilə seçilməsi daha çox gənc kadrların rəhbər vəzifələrə təyin olunmasına şərait yaradıb. Bununla belə, bəzi hallarda prosesdən sui-istifadə edildiyi ilə bağlı iddialar da gündəmə gəlir.

Redaksiyamıza daxil olan məlumatda bildirilir ki, Balakən rayonunda belə mübahisəli təyinat baş verib. İddiaya görə, Balakən şəhər 2 nömrəli tam orta məktəbin direktoru vəzifəsinə Qullar kənd 1 nömrəli tam orta məktəbin direktoru Vəfa Emçiyeva gətirilib. Qeyd olunur ki, Vəfa Emçiyevanın Qullar məktəbində rəhbərlik etdiyi dövrdə şagirdlərin qeyri-kafi (iki) qiymət göstəricisi 61% təşkil edib və bu səbəbdən o, sektora dəvət edilərək izahat verməli olub.

Məlumat sahibləri sual edirlər: bu göstəricilər fonunda həmin şəxsin şəhərin ən böyük və nüfuzlu məktəblərindən birinə təyinat alması hansı meyarlarla əsaslandırılıb?

Yerli təhsil işçilərinin iddiasına görə, bu təyinatda Elm və Təhsil naziri Emin Əmrullayevin, Şəki-Zaqatala Regional Təhsil İdarəsinin müdiri Günay Mahmudovanın, Balakən təhsil sektorunun müdiri Mehparə Murtuzəliyevanın və Vəfa Emçiyevanın təlimçi statusunun rol oynadığı bildirilir.

İddialar daha da irəli gedir: əgər bir şəxs təlimçidirsə, bu ona uğursuz nəticələr fonunda belə, böyük bir məktəbin rəhbərliyinə gətirilmək imtiyazı verirmi? Bəzi mənbələr bu təyinatın Balakən şəhər icra nümayəndəliyindən qeyri-rəsmi dəstək aldığı barədə də danışırlar.

Məsələnin ciddiliyini nəzərə alaraq, proseslə bağlı araşdırmalarımız davam edəcək.

Stimulxeber.az


Kainat.tv