Böyük Britaniyanın baş naziri Kir Starmer və Fransa prezidenti Emmanuel Makron və gələn həftə ABŞ-yə səfər edəcəklər.

KAinat.tv  xəbər verir ki, bunu ABŞ-nin milli təhlükəsizlik üzrə müşaviri Mayk Uolts deyib.

Onun sözlərinə görə, avropalı liderlər Rusiyanın Ukraynadakı müharibəsinə son qoymaq məqsədilə Vaşinqtona səfər edəcəklər.
“Fox News”a açıqlamasında Rusiya və Ukrayna arasında sülh razılaşması əldə etmək şansları barədə verilən sualı cavablandıran Uolts deyib: "Biz bütün tərəflərlə əlaqə saxlayırıq və bundan sonra növbəti addım daha ətraflı müzakirə etmək üçün texniki qruplar göndərməkdir".
“The Telegraph” isə yazır ki, Kir Starmer və Emmanuel Makron Ağ Evdə görüşləri zamanı prezident Donald Trampa Avropa qoşunlarının Ukraynaya yerləşdirilməsi planını təqdim edəcəklər.
Onlar ABŞ prezidentinin vasitəçiliyi ilə istənilən atəşkəsə əməl olunması məqsədilə 30.000-dək avropalı əsgərin Ukraynada yerləşdirilməsini müzakirə edəcəklər.
Starmer eyni zamanda Trampı Rusiya hər hansı atəşkəsin şərtlərini pozarsa, öldürücü güclə cavab vermək üçün Şərqi Avropada ABŞ qırıcılarını və raketlərini hazır vəziyyətdə saxlamağa çağıracaq.
Bundan əvvəl Pentaqonun rəhbəri Pit Heqset bəyan edib ki, Ukraynada istənilən sülhməramlı əməliyyatlara görə bütün məsuliyyət Avropa və Kanadanın çiyninə düşəcək. 
Britaniya baş naziri Trampı inandırmağa çalışacaq ki, Rusiyanın Ukraynanı üçüncü dəfə işğal edəcəyi təqdirdə, onun qarşısının alınması həm də ABŞ-nin maraqlarına uyğundur. 
Ölkə.Az