İran rəhbərliyi hazırda davam edən hərbi münaqişənin dayandırılması üçün rəsmi Vaşinqton qarşısında yerinə yetirilməsi çətin olan iki əsas tələb qoyub.

Kainat.tv Musavat.com-a istinadən xəbər verir ki, İranın yüksək rütbəli rəsmisi Möhsün Rezai müharibənin taleyinin Tehranın əlində olduğunu və yalnız müəyyən şərtlər daxilində sülh masasına otura biləcəklərini bəyan edib.

Rezainin sözlərinə görə, müharibəyə son qoyulması məsələsi yalnız o zaman nəzərdən keçirilə bilər ki, ilk növbədə ABŞ İranın çəkdiyi bütün maddi və mənəvi zərərlərə görə tam kompensasiya (reparasiya) ödəsin.

İkinci və daha strateji şərt isə gələcək üçün 100 faizli təhlükəsizlik zəmanətinin verilməsidir ki, bu da yalnız ABŞ hərbi qüvvələrinin və bazalarının Fars körfəzi regionundan tamamilə çıxarılması ilə mümkündür.

İranlı rəsmi vurğulayıb ki, Amerika hərbi varlığı bölgədə qaldığı müddətcə hər hansı dayanıqlı sülhdən söhbət gedə bilməz.

Analitiklər Rezainin bu bəyanatını Tehranın "maksimum müqavimət" kursunun davamı kimi qiymətləndirir və ABŞ-ın bu şərtləri qəbul etməyəcəyini nəzərə alaraq, döyüşlərin daha da şiddətlənəcəyini proqnozlaşdırırlar.