Bakının Nəsimi rayonunda təhlükəli vəziyyət yaranıb.

Kainat.tv xəbər verir ki, NOCOMMENT.az-ın yerli bürosu xəbər verir ki, Azərbaycan Slavyan Universitetinin yaxınlığında yerləşən ərazidə zamanında budanmayan ağaclar insanlara və onların mülklərinə ziyan vurma riskləri yaradır.

Sakinlərin bildirdiyinə görə, məsələ ilə bağlı artıq Nəsimi Rayon İcra Hakimiyyətinə və Bakı Şəhər Yaşıllaşdırma Təsərrüfatı Birliyinə müraciət edilib. Lakin indiyədək heç bir reaksiya və ya tədbir görülməyib. Gün ərzində bu ərazidən tələbələr, müəllimlər və piyadalar intensiv şəkildə istifadə edir.

Xüsusilə küləkli və yağışlı havalarda vəziyyət daha da kritikləşir.

Yerində müşahidələr göstərir ki, güclü külək və ya yağış zamanı ağacların aşması və ya iri budaqların qopması real təhlükə mənbəyidir.

Sakinlər haqlı olaraq sual edir: müvafiq qurumlar mütləq bir bədbəxt hadisənin baş verməsini gözləyirlər?

Mütəxəssislər də bildirirlər ki, bu cür hallarda vaxtında görülən profilaktik tədbirlər – ağacların budanması və ya təhlükəli olanların götürülməsi – mümkün faciələrin qarşısını ala bilər. Məsələ ilə bağlı aidiyyəti qurumların operativ reaksiya verməsi və ərazidə təhlükəsizlik tədbirlərinin görülməsi gözlənilir.