Bu gün Türkiyə Prezidenti Rəcəb Tayyib Ərdoğan Beştəpədə Nazirlər Kabinetinin iclasına sədrlik edəcək. İclasda İstanbul Böyükşəhər Bələdiyyəsinin sədri Əkrəm İmamoğlu da daxil olmaqla, 91 şübhəlinin saxlanıldığı istintaq və hüquqi proseslər müzakirə olunacaq. Bundan başqa, “Terrorsuz Türkiyə” məqsədi istiqamətində terrorla mübarizə əməliyyatlarının davam etdirilməsi də Nazirlər Kabinetinin gündəmində olacaq.
Ekspertlər isə deyir ki, Əkrəm İmamoğlu məsələsi böyüyəcək. Hətta proses çərçivəsində CHP-nin bağlanma ehtimalı da var.

Prosesin sonu necə olacaq? Ə.İmamoğlu buraxılacaq? CHP-nin bağlanması realdır? Azərbaycanın məsələyə münasibəti necədir?

Kainat.tv xəbər verir ki, Globalinfo.az-a danışan siyasi şərhçi Asif Nərimanlı deyib ki, İmamoğlunun uzun müddət həbsdə qalması ehtimalı zəif görünür:

“Məhkəmənin terrorla əlaqə iddiasını qəbul etməməsi də bu gözləntini artırdı. Lakin İmamoğlunun prezidentliyə namizədliyi çətin olacaq. Hazırda məhkəmə prosesi gedir və hər şey çıxarılacaq hökmdən asılıdır. Məhkəmə İmamoğlunu irəli sürülən ittihamlarda günahkar biləcəksə, o cümlədən, diplomunun ləğv edilməsi məhkəmə hökmü ilə təsdiqlənəcəksə, namizəd olması mümkün olmayacaq.

Fikrimcə, İmamoğlunun həbsi təkcə Türkiyə daxili siyasəti ilə yox, həm baş verən geosiyasi proseslərlə əlaqəsi var. Son prezident seçkilərindən sonra, xüsusilə Kılıçdaroğlunun sədrlikdən getməsindən sonra hadisələr CHP-nin yenilənməsi istiqamətində irəliləyirdi. Bununla bağlı həm partiya daxilində istəklər vardı, həm də Türkiyə dövlətinin nəzdində”.

asiffff

Asif Nərimanlı

Ekspertin fikrincə, AKP hakimiyyəti də bu məsələdə maraqlı tərəflərdən biridir:

“Bu yenilənmə kənar oyunçuların, xüsusilə Avropa elitasının CHP-dəki təsirlərini azaltmaq, həm də CHP üzərindən Türkiyə siyasətinə müdaxiləsini dayandırmaq planının tərkib hissəsi kimi görünür. CHP-də qlobal sol-liberal qruplarla işləyənlər əsasən Kılıçdaroğlu qanadı olub. Azərbaycana münasibətdə də bunu aydın görmək olurdu. Misal üçün, Kılıçdaroğlunun məlum Orta dəhliz layihəsində Azərbaycanı kənara qoyan layihəsi əslində Avropada hazırlanmış layihə idi.

Özgür Özelin partiya sədrliyinə seçilməsindən sonra AKP ilə başlayan normallaşma prosesi, hətta ülkücülərlə təmaslar və digər istiqamətdəki addımlar CHP-nin yenilənməsi planından qaynaqlanırdı. Yenə Özelin Azərbaycanla münasibətləri normallaşdırmaq istəklərində bunu görə bilirik”.
A.Nərimanlı deyib ki, İmamoğlu isə Kılıçdaroğlundan sonra Avropa elitasının dəstəklədiyi əsas namizəd kimi önə çıxır:
“O, prezident seçkilərində vahid namizəd olmaq imkanlarını artırırdı. İmamoğlunun namizədliyi hakimiyyət üçün ciddi rəqib riski yaradırdısa, CHP daxilində partiyanı təməl ideologiyasından uzaqlaşmasını istəməyən qruplar tərəfindən də qəbul edilmir. Fikrimcə, bu həbs CHP-nin yenilənməsinə qarşı maneələrin və Avropa elitasının Türkiyə siyasətinə təsirlərin aradan qaldırılmasına hesablanıb. Baş verənlər, xüsusilə etirazların Türkiyədə hakimiyyət dəyişikliyinə səbəb olacağı haqda ehtimallar zəifdir.

Azərbaycan Türkiyədə baş verənlərə neytral mövqe sərgiləyir və əsas yanaşma qardaş ölkənin sabitliyinin pozulmamasıdır. Hərçənd, CHP-nin yenilənməsi, qardaş ölkənin ana müxalifət partiyasında Azərbaycana qarşı olan mövqeyin zəifləməsi bizim də maraqlarımıza uyğundur”.