İstanbul Böyükşəhər Bələdiyyəsinin (İBB) sədri Əkrəm İmamoğlu 7 il 4 aya qədər həbs edilə bilər. Bununla bağlı müvafiq ittiham aktı hazırlanıb.
Məlumata görə, sözügedən aktda qeyd edilir ki, İmamoğlunun ictimaiyyət qarşısında çıxışlarından biri zamanı işlətdiyi ifadələr alçaldıcı məzmun daşıyıb.
Türkiyədə son zamanlarda müxalifətin əsas simalarından birinə çevrilən Zəfər Partiyasının sədri Ümit Özdağın həbs edilməsi fonunda İmamoğlu ilə bağlı da prosesin başladılması diqqət çəkir. Hər iki şəxs növbəti prezident seçkilərində əsas namizədlərdən biri olaraq qəbul edilirdilər.
Son baş verənlər Türkiyə üçün nə vəd edir? İmamoğlunun həbsi onun nümayəndəsi olduğu Cümhuriyyət Xalq Partiyası (CHP) daxilində kimlərin işinə yaraya bilər?
Globalinfo.az-a danışan siyasi şərhçi Kənan Novruzov deyib ki, İstanbul Böyükşəhər Bələdiyyəsinin (İBB) sədri Əkrəm İmamoğlunun asanlıqla həbs olunması real görünmür:
“Məsələ ondadır ki, Türkiyə daxilində Əkrəm İmamoğlunun kifayət qədər tərəfdarı var. Bundan başqa onun şəxsi nüfuzu da az deyil. Belə olan halda siyasətçinin həbsi ölkədə ciddi ajiotaj yaradacaq.
Burada sual yaranır ki, İmamoğlunun həbsi hakim Ədalət və İnkişaf Partiyasına (AKP) lazımdırmı? Düşünürəm ki, yox! İmamoğlu həbs olunarsa, Qərb Ankaraya təzyiqləri artıracaq. Odur ki, çox güman, məsələ həllini tapacaq, onu gözləyən cəza yüngülləşəcək”.