Milli Məclisin komitə iclasında pensiya kapitalı ilə bağlı aparılan müzakirələr diqqət çəkib. Vətəndaşın pensiya yaşına çatmazdan əvvəl yığılan kapitalın bir hissəsindən istifadə edə bilməsi haqda səsləndirilən fikirlər müsbət qarşılanıb. Təklifə əsasən, onlar bundan səhiyyə, təhsil və digər zəruri xərclər üçün yararlana bilərlər.

Bu mexanizmin tətbiqi mümkündürmü?

Kainat.tv xəbər verir ki, Globalinfo.az-a danışan iqtisadçı Pərviz Heydərov deyib ki, sözügedən təklif bir neçə aspektdə vacib məsələdir:

“Vətəndaşlar pensiya kapitallarında maraqlı olmalı və məcburi dövlət sosial ayırmanın ödənişinə həvəslə yanaşmalıdırlar. Reallıqda isə pensiya yaşına çatmamış yığılan kapitaldan istifadə edə bilməmək çoxunun diqqətində deyil. Ən azı ona görə ki, pensiya hüququ əldə etmək yaşı yüksək, yəni 65-dir. Digər tərəfdən, vətəndaşın öz pensiya kapitalından istifadə edə biləcəyinə həmişə qarant olmalıdır. Yəni bir şəxs 35-40 il işləyib müəyyən məbləğdə pensiya kapitalı yığıbsa, bu, məhz özünə qismət olmalıdır”.

pppp
 
 Pərviz Heydərov

İqtisadçı bildirib ki, səhhətində problem olanların pensiya yaşına çatmamış yığılan kapitaldan faydalanması daha məqsədəuyğundur:

“Belə addımın atılması pensiya-sığorta sisteminin formalaşması və onun islahatının həyata keçirilməsinə də töhfə verəcək. 2019-cu ildən etibarən Dövlət Sosial Müdafiə Fondunun (DSMF) büdcəsi təkmilləşsə də, dövlətdən asılılıq var. Pensiya kapitalından istifadəyə imkan yaradılması ilə bu sahədə sosial sığorta ödənişlərinin sürətini və həcmini artırmaq olacaq”.