Prezidentin köməkçisi Borrelin paylaşımlarına münasibətdə bildirib ki, Aİ-nin “bağ”, dünyanın qalan hissəsinin isə “cəngəllik” kimi təsvir edilməsi son dərəcə təəssüf doğurur. H.Hacıyev inkişaf etməkdə olan kiçik ada dövlətləri, eləcə də ittifaqa üzv ölkələrin dənizaşırı regionlarının iqlim dəyişikliyindən ciddi şəkildə əziyyət çəkdiyini diqqətə çatdırıb. O, özünüidarəetmədən məhrum edilmiş dənizaşırı regionların narahatlıqlarını ifadə edə bilmədiyini vurğulayıb. Həmçinin ittifaqa bəzi üzv dövlətlərin müstəmləkəçilik və qul ticarəti ilə bağlı keçmişini xatırladıb.
Prezidentin köməkçisi COP29-da Azərbaycanın hər bir səsin eşidilməsi üçün inklüziv platforma təqdim etdiyini xatırladıb.
Kainat.tv xəbər verir ki, Globalinfo.az-a danışan politoloq İlyas Hüseynov deyib ki, Aİ rəsmisi Cozef Borrelin dəfələrlə ölkəmizə qarşı müxtəlif fikirlər səsləndirdiyinin şahidi olmuşuq:
“Həmçinin COP29 tədbirini pozmaq məqsədilə müxtəlif cəhdlər də nümayiş etdirilir. Bütün bunlara baxmayaraq 70 mindən artıq şəxs sammitə qatılmaq üçün ölkəmizə gəlib. 80-dən çox dövlət başçısı, habelə hökumət rəhbəri, jurnalist, ekspertlər bu mötəbər tədbirdə iştirak edirlər. Azərbaycan hazırda dünyanı gözləyən iqlim təhlükəsi və ekoloji problemlərə qarşı mübarizənin qalasına çevrilib. Planetimizlə bağlı təhdidlərin qarşısının alınması üçün Bakıda əhəmiyyətli müzakirələr aparılır.
İlyas Hüseynov
Təəssüf ki, hələ də bəzi ölkələr neomüstəmləkə təfəkküründədir. Əsarətdə saxladıqları ərazilərə təbii ehtiyat və resurs mənbəyi kimi baxırlar. Bu dövlətlərin keçmişinə nəzər saldıqda törətdikləri amansız soyqırımları, qul ticarətini də görmək mümkündür. İndi məhz bu dövlətlər öz keçmişlərinə baxmadan COP29-u boykot etmək istəyirlər. Çox gülüncdür!
Bu mənada Hikmət Hacıyevin Cozef Borrelə cavabı yerində və olduqca vacibdir. Rəsmi Bakı bundan sonra da bizə qarşı səsləndirilən şər-böhtanlara susmayacaq, layiqli cavab verəcək”.
