Bakı-Sumqayıt şossesi boyunca yüksəkgərginlikli elektrik ötürücü xətlərinin mühafizə zolağında yerləşən torpaq sahələrinin satılması və həmin ərazilərdə tikinti işlərinin aparılması davam edir.

Kainat.tv xəbər verir ki, növbəti belə hal Bakı-Sumqayıt şossesi ərazisində qeydə alınıb. Belə ki, yüksəkgərginlikli elektrik xəttinin birbaşa altında dəmir konstruksiyalardan ibarət iri obyektin tikintisi həyata keçirilir.

Məsələ ilə bağlı Abşeron Rayon İcra Hakimiyyətinə göndərilən rəsmi sorğular isə cavabsız qalıb. Tikintinin hansı əsasla aparıldığı, buna kim tərəfindən icazə verildiyi və təhlükəsizlik normalarına necə riayət olunduğu barədə ictimaiyyətə heç bir məlumat verilmir.

Diqqət çəkən digər məqam isə tikinti işlərinin "Azərenerji" ASC-nin mühafizə zolağında aparılmasına baxmayaraq, indiyədək hər hansı müdaxilənin edilməməsidir. Halbuki qüvvədə olan tikinti və təhlükəsizlik normalarına əsasən, yüksəkgərginlikli elektrik xətlərinin mühafizə zonasında tikinti aparılması ciddi məhdudiyyətlərə tabedir və insanların həyatı üçün təhlükə yaradan obyektlərin inşasına yol verilmir.

Mütəxəssislər bildirirlər ki, bu cür ərazilərdə tikilən obyektlər həm elektrik təhlükəsizliyi baxımından ciddi risk yaradır, həm də fövqəladə hadisələr zamanı ağır nəticələrə səbəb ola bilər.

Abşeron Rayon İcra Hakimiyyəti və "Azərenerji" ASC həmişəki kimi susur...  Qanunları saymırlar, heç kimdən çəkinmirlər... //Bizimesr.com