ABŞ, Böyük Britaniya, Avropa İttifaqına (Aİ) üzv dövlətlər, Ukrayna və Rusiyadan olan ekspertlər müharibəyə son qoya biləcək strategiya hazırlayıblar.

Kainat.tv xəbər verir ki, bu barədə “Atlantic Council” (Atlantik Şurası) məlumat yayıb.

Strategiya doqquz bənddən ibarətdir və ABŞ-ın gələcək administrasiyası (Donald Tramp) üçün siyasi tövsiyələr kimi təqdim olunub. Sənəddə Ukraynanın NATO və Aİ-yə üzvlüyü tələbi də qoyulub.

“Prezident Donald Trampın Rusiyaya qarşı daha effektiv təzyiq kampaniyası aparmaq və müharibəyə son qoymaq imkanı var. Bu, Rusiya və onun müttəfiqlərinə mane olacaq və Üçüncü Dünya Müharibəsi ehtimalını azaldacaq”, - qurum bildirir.

ABŞ-ın gələcək administrasiyası üçün ekspertlərin tövsiyələrinə aşağıdakılar daxildir:

- Mövcud xətlər üzrə erkən atəşkəs yüksək intensivlikli müharibəni dayandıra bilər. Atəşkəs yerdəki qoşunlar tərəfindən təmin edilməlidir. NATO-nun Avropa üzvləri ABŞ-ın dəstəyi ilə bu səylərə rəhbərlik etməlidir.

- Müharibənin sona çatması üçün müdafiə zəmanətləri ilkin şərt olacaq. NATO-ya yekun üzvlük Ukraynanın suverenliyi və təhlükəsizliyini təmin etmək üçün optimal yoldur.

- NATO-nun Ukraynadakı müdafiəsi onun resursları, qabaqcıl hərbi texnologiya və döyüşdə möhkəmlənmiş ordusu üzərində qurula bilər. Bu ordu kənardan dəstəklə gücləndirilməlidir.

- NATO-nun müdafiə zəmanəti yalnız Ukrayna ərazisinin hökumətin nəzarəti altında olan hissəsinə şamil ediləcək.

- ABŞ və Avropa Rusiyanın Ukraynaya ərazi iddialarını tanımamalı və sərhədlərin güc yolu ilə dəyişdirilməsini rədd etməlidir.

- NATO üzvü kimi Ukrayna beynəlxalq səviyyədə tanınmış sərhədləri daxilində ərazi bütövlüyünü sülh və diplomatik vasitələrlə bərpa etməyi öhdəsinə götürür.

- Avropa Ukrayna və özünün təhlükəsizliyi üçün daha çox iş görməlidir.

- ABŞ və müttəfiqlərinin Rusiyanı cilovlamaq üçün yeni siyasətə ehtiyacları var.

- Bütün bu addımlar Avropaya sülh gətirəcək, ABŞ və müttəfiqlərinin təhlükəsizliyi və rifahını gücləndirəcək, potensial təcavüzkarların qarşısını alacaq və Amerikanın qlobal liderliyini bərpa edəcək. //Teleqraf.com