Bunun səbəbi nədir? Ukrayna üstünlük qazanmağa başlayır?
Kainat.tv xəbər verir ki, Globalinfo.az-a danışan politoloq Rəşad Bayramov deyib ki, Rusiya-Ukrayna cəbhəsində son bir neçə müddətdir ki, vəziyyətin daha da gərginləşdiyi hiss olunmaqdadır:
“Xüsusilə də ABŞ və digər Qərb dövlətlərinin Ukraynaya ötürdükləri raketlərdən Rusiyanın dərinliklərinə zərbələr endirməyə icazə verməsindən sonra müharibə kəskin mərhələyə qədəm qoyub.
Məlumdur ki, ATACMS tipli uzaqmənzilli raketlərdən istifadədən sonra Ukrayna tərəfi ilk dəfə olaraq Britaniyanın “Storm Shadow” raketləri ilə Rusiyaya zərbələr endirib. Xüsusilə də Kursk vilayəti uzaqmənzilli raketlərlə hücuma məruz qalıb.
Rusiya da bu hücumlara cavab olaraq Donbas və Novorossiya istiqamətində hücumların tempini artırıb. İndi Rusiya demək olar ki, hər gün az da olsa müəyyən irəliləyişə nail olur. Qərb yaxşı başa düşür ki, Ukrayna münaqişə başlanan andan ən zəif vəziyyətə düşüb. Və elə əslində raketlərdən istifadə ilə bağlı qadağanın aradan qaldırılması da Rusiyanın irəliləyişinin aradan qaldırılmasına hesablanıb. İkinci bir tərəfdən isə Qərb Ukraynanı əlverişli mövqeyə çıxarmaqla Tramp hakimiyyəti dönəmində mümkün ola biləcək danışıqlar prosesində Ukraynanın əlini möhkəmləndirmək istəyir. Buna necə nail olacaqlarını təbii ki, zaman göstərəcək”.
Rəşad Bayramov
Politoloqun sözlərinə görə, Ukrayna tərəfi prezident Zelenskinin timsalında belə hesab edir ki, silah və texnikanın göndərilməsi davam etdirilməli və Qərb bununla da kifayətlənməyərək Rusiyaya qarşı birbaşa döyüş əməliyyatlarına qatılmalıdır:
“Lakin Rusiya tərəfinin öz nüvə doktrinasına dəyişikliklər etməsi və nüvə silahından istifadə edə biləcəyi ilə bağlı verdiyi mesajlar təbii olaraq bir sıra ölkələri çəkindirir. Təsadüfi deyil ki, Rusiyanın “Qreşnik” raketindən istifadəsindən sonra Qərbin özündə də Ukraynaya Rusiyanın dərinliklərinə zərbələr endirmək üçün əlavə raketlərin ötürülməsi ilə bağlı fikir ayrılığı ortaya çıxıb. Ukraynanın əlində isə uzaqmənzilli raketlərin sayı isə Rusiyanı dizə gətirəcək qədər deyil.
Rusiyanın indiki halda müəyyən qədər səssiz qalmasının da səbəbi əslində elə bununla bağlıdır. Rusiya cavab zərbəsi endirdi və bu tipli raketlərlə istənilən zaman kütləvi hücumlar təşkil edə biləcəyinin mesajını verdi. Bunun ardınca Ukrayna tərəfinin uzaqmənzilli raketlərdən istifadəsinin intensivliyi də azaldı. İndi Rusiya səssiz qalmaqla faktiki olaraq Qərbə mesaj göndərir və bildirir ki, raketlərin tədarükü davam edəcəyi, Rusiyanın strateji obyektlərinə qarşı hücumlar olacağı halda hədəf təkcə Ukrayna olmayacaq. Məsələn, Ukraynaya silah tədarükündə əsas dəhliz rolunda çıxış edən Polşa da hədəfə alına bilər. Bu isə artıq NATO-nun birbaşa müharibəyə qoşulmasına və nəticədə Rusiya tərəfindən taktiki nüvə silahının istifadəsinə gətirib çıxara bilər. Odur ki, indi Qərb də tərəddüd içindədir”.
