Rusiyanın cavabı nə olacaq?
Kainat.tv xəbər verir ki, Globalinfo.az-a danışan politoloq Elşad Həsənov deyib ki, Rusiya-Ukrayna cəbhəsində vəziyyət daha da gərginləşib:
“Buna səbəb ABŞ prezidenti Co Baydenin Ukraynaya ATACMS raketləri ilə Rusiya ərazilərinə, hərbi obyektlərinə zərbə endirməsinə icazə verməsi oldu. Noyabrın 20-sində isə Rusiya prezidenti yenilənmiş nüvə doktrinası elan etdi. Bildirdi ki, Rusiyanın ərazisinə, milli təhlükəsizliyinə, Belarusa hücum olarsa, nüvə silahından istifadə etmək hüququnu özündə saxlayır. Bununla da Qərbi, ABŞ-ı şantaj etməyə başladı.
Noyabr ayının 23-də Ukrayna həmin raketlərdən istifadə edərək Kursk, Bryansk şəhərlərinə raket zərbələri endirdi. Rusiyanın S-400 raket qurğusu məhv edildi. Ukraynanın verdiyi məlumata görə, 500-dən çox Koreya əsgər və zabiti məhv edilib. Onların yüksək rütbəli generalları da həlak edilib. Rusiyanın verdiyi məlumatla həmin hücumlar təsdiqləndi. Rusiya ATACMS raketlərini zərərsizləşdirməyi bacarıb. Müharibənin qaydasına uyğun olaraq bir tərəf hücumun əhəmiyyətini azaltmağa, digər tərəf isə daha da şişirtməyə çalışır”.
Elşad Həsənov
Politoloqun sözlərinə görə, Rusiya Ukrayna ilə yanaşı ATACMS və ya digər bu qəbildən silahları istehsal edən ölkələrə zərbə endirə bilər:
“Müharibə daha qlobal xarakter alır. Bunun qarşısı alınmasa daha geniş ərazini əhatə edəcək. ABŞ-ın yeni seçilmiş Prezidenti Donald Trampın bir gün ərzində Ukrayna müharibəsini bitirməsi qeyri-mümkündür. Andiçmə mərasiminə qədər Qərb və ABŞ Ukraynanın vəziyyətini yaxşılaşdırmaq üçün ciddi dəstək verirlər. Rusiya isə daha çox ərazi işğal edərək danışıqlarda üstünlüyünü qorumağa çalışır. Rəsmi Moskva ələ keçirdiyi ərazilərdən geri çəkilmək niyyətində deyil”.
