Xəbər verdiyimiz kimi, Yasamal Rayon Məhkəməsində Mərkəzi Bankın sabiq sədri, hazırda baş nazirin müavini olan Elman Rüstəmovun adı keçən məhkəmə prosesi keçirilir.

Geniş ictimaiyyətin diqqət mərkəzində olan bu cinayət dosyesinin mərkəzində Elman Rüstəmovun Mərkəzi Bank sədri olarkən verdiyi qanunsuz göstəriş dayanır. Həmin göstərişə əsasən, o zaman Elman Rüstəmovun tikinti biznesində şəriki olan Azad Nağıyevə “Premium Bank” və “Dekabank” 5 milyon manat güzəştli kredit ayırıblar!

“Cırtdan nağılı” deyil - 5 milyon manatlıq kredit 337 min manat dəyəri olan əmlak girov götürülməklə verilib!
2013-cü ildə kredit ayrılarkən böyük qanunsuzluqlara, cinayətlərə yol verilib. Belə ki, vətəndaş Nizami Kərimova məxsus əmlakın sənədləri saxtalaşdırılıb və 5 milyon manat kredit qarşılığında banklara girov qoyulub!

Niyə məhz Nizami Kərimova məxsus əmlak girov qoyulub?

Nizami Kərimov 2010-cu ildə Elman Rüstəmova məxsusluğu bilinən “Aqana” MMC-dən qeyri-yaşayış sahəsini satın alıb və həmin ildən bu sahədən istifadə etməyə başlayıb.

2013-cü ildə Elman Rüstəmov “Aqana” MMC-nin direktoru Azad Nağıyevə əmlak girov qoymaqla kredit götürməsini tapşıranda, Azad Nağıyev Nizami Kərimova məxsus qeyri-yaşayış sahəsini sahibindən xəbərsiz, sənədləri saxtalaşdırmaqla öz adına alqı-satqı edib. Alqı-satqı müqaviləsində qeyri-yaşayış sahəsinin 337 min manata aldığını göstərib və saxta çıxarış alıb. Bundan sonra Mərkəzi Bank heç bir rəsmi gəliri olmayan Azad Nağıyevə həmin saxta çıxarışla əmlakı girov qoymaqla 2 bankdan 5 milyon manat, həm də istehlak (!)krediti ayırıb! Həm də illik 5,6 faizlə!!
Alqı-satqı müqaviləsində 337 min manata alındığı göstərilən əmlakı girov götürüb, yüklü edib 5 milyon manat, özü də Mərkəzi Bank tərəfindən 5.6 faizlə kredit verilməsi sadəcə ağlasığmazdır!

Saxta çıxarış ləğv olunsa da, əmlakı bankların girovluğundan çıxarmırlar!!!

Hətta Azərbaycan reallığında bu, mümkünsüzdür! Amma bu şərtlərlə kredit ayrılması baş verib! Həmin vaxt Azərbaycanda istehlak krediti 24-30 faizlə verilirdi! Kredit veriləndən 5 il sonra əmlakın əsl sahibi Nizami Kərimov bu maxinasiyadan xəbər tutub, Nəsimi Rayon Məhkəməsinə müraciət edib. Cinayəti icra edən şəxs Azad Nağıyev həbs olunub, qeyd etdiyimiz kimi, məhkum olunub. 5 milyon manat kredit götürülərkən girov qoyulan əmlaka dair saxta çıxarış ləğv olunub!

İndi isə Mərkəzi Bank cinayət yolu ilə verilmiş kreditə görə əmlakın qanuni sahibi Nizami Kərimovdan əmlakı müsadirə etdirməyə çalışır. Halbuki qeyd olunan kredit alınarkən təqdim olunmuş saxta çıxarış ləğv olunub və əmlak bu gün də qanuni sahibinin adınadır!

5 milyon kredit alıb, Elman Rüstəmova verib! – həbsdəki şəriki belə deyir

Hazırda həbsdə olan Azad Nağıyev məhkəməyə müraciətində yazır ki, banklardan Elman Rüstəmovun göstərişinə əsasən aldığı krediti onun özünə verib. Maraqlıdır ki, Azərbaycan məhkəmələri bu xüsusatın üstündən sükutla keçməyə üstünlük verirlər. Bu səbəbdən də 5 milyon manat güzəştli kredit dosyesinin məhkəmədə araşdırılması hələ ki, baş tutmayıb. Elman Rüstəmovun Mərkəzi Bank sədri olduğu dönəmdə sirr kimi saxlanılan kredit dosyesinin üzərindən bu gün də sirr pərdəsini götürmək mümkün olmur.

Elman Rüstəmovun gizlətməyə çalışdığı da məhz bu xüsusatdır!

5 milyon manatlıq kredit vətəndaş Nizami Kərimovun qeyri-yaşayış sahəsinin özündən xəbərsiz banklara girov qoyulmaqla götürülüb. Elman Rüstəmovun gizlətməyə çalışdığı da məhz bu xüsusatdır!

Hazırda Yasamal Məhkəməsində tərəflərdən biri olan Nizami Kərimovun vəkilləri həqiqətin üzə çıxması üçün 5 milyon manatlıq kreditin dosyesinin araşdırılmasını tələb edirlər. Hakim Ayşən Sultanova-Məmmədova isə kredit dosyesinin araşdırılmasını hələ ki, təmin etməyib. Kredit dosyesi bu və ya digər şəxsə kredit verilərkən toplanır. Dosyedə kredit üçün müraciət etmiş şəxsin kredit tarixçəsi, əvvəllər götürdüyü kreditləri qaytarıb-qaytarmaması, kredit müqabilində girov olaraq təqdim etdiyi əmlaklara baxış keçirilməsi və s. sənədlər yer alır.

Kredit dosyesini buna görə gizlədirlər!

Nizami Kərimovun əmlakı özündən xəbərsiz girov qoyulub və 5 milyon manat kredit götürülüb. Nəsimi Rayon Məhkəməsində bu məsələ araşdırılarkən bu xüsusat təsdiq olunsa da, 5 milyon manatlıq kredit dosyesi ortalığa çıxarılmayıb, məhkəmədə tədqiq olunmayıb! Bununla belə, Elman Rüstəmovun şəriki Azad Nağıyevin Nizami Kərimovun əmlakını özündən xəbərsiz girov qoyması, bunun üçün əmlaka aid sənədləri saxtalaşıdırdığı təsdiqlənib.

Azad Nağıyev sənədləri saxtalaşdırma, dələduzluq maddələri ilə 12 il müddətinə azadlıqdan məhrum edilib. Nəsimi Məhkəməsi Azad Nağıyevin Nizami Kərimovun əmlakını özündən xəbərsiz, sənədləri saxtalaşdırmaqla girov qoyulduğunu çıxardığı qətnamə ilə təsdiq edib, lakin Nizami Kərimovun əmlakını bankların yüklülüyündən azad etməkdən yayınıb. İndi isə Yasamal Məhkəməsi də eyni mövqedə dayanmış kimi görünür.
Kredit dosyesinin üzə çıxaracağı həqiqətlər niyə qorxulu yuxuya dönüb?

5 milyon manatlıq kredit dosyesinin məhkəməyə gətirilərək tədqiqi həqiqəti üzə çıxarmaq gücündədir. Kredit dosyesi məhkəmədə tədqiq olunarsa, bilinəcək ki, Azad Nağıyevə kredit verən bankların nümayəndələri krediti verərkən Nizami Kərimova məxsus olan əmlaka baxış keçiriblərmi? Keçiriblərsə, Nizami Kərimov həmin vaxt orada olubmu? Keçirməyiblərsə, 5 milyon manatın təminatı olan girova baxmadan krediti necə ayırıblar? Baxış keçirilməməsi nə ilə əlaqəli olub?

Məsələn, 50 min manat kredit üçün 50 cür sənəd tələb edən, girovun təminatı olan əmlaka 50 dəfə baxış keçirən bankların bu qanunsuzluğu nə ilə əlaqəli olub?

Əmlaka baxış keçirilmədən girov verilməsi tapşırığı olubmu? Olubsa, belə bir tapşırığı banklara kim verib?

Hələ ki, Yasamal Məhkəməsi bu suallara aydınlıq gətirilməsinə, həqiqətin üzə çıxmasına tələsmir.

Yasamal Məhkəməsi Mərkəzi Bankın və digər qurumların təzyiqi ilə vətəndaş Nizami Kərimovun əmlakının əlindən alınmasını rəsmiləşdirəcək qərar verə bilər.

Dekabrın 6-da Yasamal Məhkəməsində qalmaqallı cinayət dosyesi üzrə proses davam etdiriləcək.

İllər öncə Mərkəzi Bank rəhbəri olan Elman Rüstəmovun göstərişi ilə törədilən bu özbaşınalıq, qanunsuzluq məhkəmə qərarı ilə bərkidilərsə, Nizami Kərimovun durumuna istənilən Azərbaycan vətəndaşı salına bilər - özündən xəbərsiz əmlakı sənədləri saxtalaşdırılmaqla banka girov qoyular, külli miqdarda kredit götürülər və sonda kreditin təminatı olan, lakin kreditə heç bir formada aidiyyəti olmayan əmlak sahibinin əlindən alınmaqla müsadirə oluna bilər! //Musavat.com