Moldova Respublikasının Sosialistlər Partiyası prezident seçkilərinin ikinci turunda qalib gəldiyi bildirilən Maya Sandunu qeyri-legitim prezident hesab edir. Bu barədə sosialistlərin lideri, keçmiş prezident İqor Dodon öz Teleqram kanalında məlumat yayıb.
Moldova qarışa bilərmi? Vətəndaş müharibəsi, inqilab gözlənilirmi? Rusiya bu ölkəni əldən verməmək üçün nə kimi plan hazırlayıb?
Moldovanın Qərb və Rusiya arasında “nifaq alması”na çevrilməsinin səbəbi nədir? Hansı coğrafi, geopolitik, loqistik üstünlükləri var Moldovanın ki, uğrunda ABŞ-la Rusiya savaşır?
Kainat.tv xəbər verir ki, Globalinfo.az-a danışan siyasi şərhçi Əli Mustafayev deyib ki, Moldovada keçirilən seçkilər çoxluq tərəfindən legitim seçki hesab olunur:
“Bunun azad və ədalətli aparıldığını düşünürlər. Amma Rusiyanın yanaşması fərqlidir, bununla barışmır. Çünki Kreml burada istədiyi nəticəni ala bilmədi. Rusiyanın nümayəndəsi seçilsə idi, rəsmi Moskva nəticələrdən məmnun qala bilərdi. Mətbuatda yer alan məlumatlara görə, Kreml burada böyük çaba göstərib. Belə ki, seçkilərə 150 milyon dollar pul xərcləndiyi iddia edilir. Eyni zamanda seçkiyə əlavə insanlar cəlb edilib, avtobuslar təşkil edilib və s. Bütün bunlara rəğmən Rusiya uğursuzluğa düçar olub”.
Əli Mustafayev
Siyasi şərhçinin sözlərinə görə, seçki saxtalaşdırılmayıb:
“Çoxluq indiki prezidentin qalib gəlməsi üçün səs verib. Bu baxımdan nəticələrin Moldovada hansısa problemlər yaradacağını düşünmürəm. Rusiya istəsə də nəticələri dəyişə bilməyəcək. Moldova cəmiyyətinin əhəmiyyətli hissəsi Avro-inteqrasiya xəttinə sadiqdir. Avropa Birliyinin üzvü olmaq, qaynayıb-qarışmaq istəyirlər. Maya Sandu da bu siyasi kursa bağlıdır. Moldovadakı Rusiyanın “5-ci kolonu” etiraz etsələr də ciddi nəticələr yaratmayacaq”.
Əli Mustafayev vurğulayıb ki, Moldovanın əhəmiyyəti böyükdür:
“Ukrayna, Rumıniya ilə qonşu ərazidir. Özünəməxsus strateji əhəmiyyətə sahibdir. Rusiya Moldovanı ələ keçirsə, Ukraynanı bu istiqamətdə sıxışdırmaq imkanını əldə etmiş olacaq. Bu da Qərbin, ABŞ-ın maraqlarına uyğun deyil. Onlar Rusiyaya bağlı rejimlərin azalmasını istəyirlər. Bu seçimlərin arxasında Rusiyadan daha çox Moldova xalqının iradəsi əhəmiyyətlidir”.
