Səfirlərin qarşılıqlı şəkildə XİN-ə çağırılması nədən xəbər verir? Növbəti addım iki ölkə arasında diplomatik münasibətlərin dayandırılması ola bilər?
Kainat.tv xəbər verir ki, Globalinfo.az-a danışan politoloq Sultan Zahidov deyib ki, proses iki ölkə arasındakı münasibətlərin gərgin vəziyyətində olduğunu göstərir:
“Bu, ilk hadisə deyil. Daha əvvəl də Fransa səfiri Azərbaycan XİN-ə çağırılmış, lazımi xəbərdarlıqlar edilmişdi. Son bir neçə il ərzində Fransanın Azərbaycana qarşı həyata keçirdiyi ədalətsiz, qərəzli, ikili standartlara dayanan siyasətindən irəli gəlir. Xüsusilə də İkinci Qarabağ müharibəsi zamanı Fransa rəsmi Bakını təcavüzdə günahlandırırdı. Qarabağ müharibəsindən bir ay keçməmiş Fransa Milli Asambleyasında Azərbaycana qarşı qərəzli qətnamə qəbul edildi. Sonrakı müddətdə Parisin İrəvanla imzaladığı hərbi texniki müqavilələr, silah, texnika dəstəyi, eləcə də Fransa Prezidenti Emmanuel Makronun bəyanatlarında ermənipərəst fikirlərin sezilməsi və s. fonunda belə mənzərə yaranır ki, Parisin Cənubi Qafqaz siyasətində erməni təəssübkeşliyi var”.
Sultan Zahidov
Politoloqun sözlərinə görə, Fransa regionda gərginliyin olmasında maraqlıdır:
“Azərbaycan da buna qarşı çıxıb, mövqe ortaya qoyduğu üçün Fransa ölkəmizə qarayaxma kampanyasını aparmaqda davam etdi. Bu proses COP29 ərəfəsində də davam etmişdi. Hətta rəsmi Paris digər ölkələri sözügedən sammitdə iştirak etməməyə çağırmışdı. Halbuki COP29 BMT-nin tədbiridir və qlobal məsələlər müzakirə olunur. Sammit çərçivəsində olduqca mühüm məsələlər müzakirə olundu, böyük miqdarda maliyyə dəstəyi ayrıldı. Bunun baş tutmasında Azərbaycan da pay sahibi idi. Fransa nəyə görəsə bunu görməzdən gəldi. Qlobal iqlim dəyişikliyi yolunda atılmış mühüm addımları, nəticələri heçə saydı.
Bütün bu proses iki ölkə arasındakı münasibətlərə mənfi təsir göstərdi. Lakin diplomatik münasibətlərin yaxın günlərdə tamamilə kəsiləcəyini düşünmürəm”.
