Məlumata görə, Şolts Putini danışıqlara başlamaq üçün müharibəni dayandırmağa və qoşunları geri çəkməyə çağırıb, əks halda Berlinin Kiyevə lazım olanadək dəstək verəcəyini xatırladıb. Putin isə iyunda irəli sürdüyü şərtləri təkrarlayaraq sülh üçün başlıca 3 prinsip əsasında müzakirələr aparıla biləcəyini deyib.
Ekspertlər iddia edir ki, Rusiyanın təhlükəsizlik maraqları nəzərə alınacaq, yeni ərazi reallıqları əsas götürüləcək, münaqişənin səbəbinin kökləri aradan qaldırılacaq.
Putin həmçinin, Almaniya ilə enerji əməkdaşlığını davam etdirməyə hazır olduqlarını Şoltsun diqqətinə çatdırıb. Diqqətçəkən digər bir məqam isə Putinlə danışıqdan əvvəl, Şoltsun Ukrayna Prezidenti Volodimir Zelenskini məlumatlandırdığı bildirməsidir. Lakin Zelenski öz videomüraciətində Şoltsu tənqid edərək, bu telefon zənginin Putini təcriddən çıxaracağından və digərləri üçün də əmsal təşkil edəcəyindən şikayətlənib.
Kainat.tv xəbər verir ki, Globalinfo.az-a danışan politoloq Elxan Şahinoğlu deyib ki, O.Şoltsun V.Putinlə danışacağı 20 gündür bilinirdi:
Elxan Şahinoğlu
“Almaniya kansleri müsahibələrin birində buna eyham vurmuşdu ki, Putinlə telefon danışığı baş tuta bilər. Halbuki Rusiyanın Ukraynada işğalçı müharibəyə başlamasından sonra Qərb liderləri Putinlə əlaqələri kəsmişdi. Zelenski buna görə Qərbin Ukraynaya dəstəyinin azala biləcəyindən ehtiyat edir.
Hesab edirəm Ukraynanın narahatlığının bir digər səbəbi də Donald Trampın prezident seçilməsi ilə bağlıdır. Tramp münaqişələri bitirmək istəyir. Andiçmədən sonra onun ilk işi Rusiya-Ukrayna müharibəsinə yönələcəyi deyilir.
Qərb Ukraynaya verdiyi dəstəyin qarşılığını görə bilmir. Buna görə də alternativ vasitələr barədə düşünür. Yəni əgər Ukrayna ərazilərini geri ala bilməyəcəksə o zaman sülh danışıqları başlamalıdır”.
