Rusiya hansı məsələyə görə bu cür qabaqlayıcı tədbirlər görür? Ölkəyə terrorçu, diversant qruplar gələ bilər? Yoxsa başqa səbəblər, amillər var?
Kainat.tv xəbər verir ki, Globalinfo.az-a danışan politoloq Ramiyə Məmmədova deyib ki, Rusiya üçün prioritet ölkənin təhlükəsizliyidir, iqtisadiyyat və s. sonra gəlir:
“Bununla bağlı uzun illərdir mühüm işlər görülür. Rusiya Prezidenti Vladimir Putin də hər çıxışında bu məsələlərə diqqət çəkir. Ukrayna müharibəsindən sonra ölkə təhlükəsizliyinin təmin edilməsi prosesi xeyli genişləndirilib. Vaxtilə ABŞ-da Donald Trampın hakimiyyətə gəlişini Rusiya ilə əlaqələndirmişdilər. Bunun ardınca Kremlə məxsus media orqanlarının saytlarını kiber hücumlarla dağıtdılar. Co Baydenin hakimiyyətə gəlməsi isə Rusiyanı təhlükəsizlik məsələlərində daha çox iş görməyə sövq etdi. Bu zaman Ukrayna savaşı artıq qapıda idi”.
Ramiyə Məmmədova
Ramiyə Məmmədovanın sözlərinə görə, Rusiya ölkəyə gələn miqrantlarla bağlı xeyli tədbirlər həyata keçirir:
“Əvvəl Rusiyaya gedən insanlar gömrüklərdə ciddi yoxlamalardan keçmirdilər. İndi isə hər bir şəxs çox ciddi yoxlanmadan keçir. Bu insanların Rusiyaya nə üçün gəldiyi ilə bağlı araşdırmalar aparılır. Bir şəxsin hansı ölkədən gəlməsi də xüsusi diqqət edilən mövzudur. Rusiyaya gedənlərin 10 gün sonra qeydiyyat məsələləri dəqiqləşdirilir, harada yerləşdikləri haqqında məlumat toplanır. Bütün bunlar təhlükəsizlik üçün həyata keçirilir. Rusiya Prezidenti Vladimir Putin açıqlamalarında qeyd edir ki, ölkəyə həddindən artıq işçi qüvvəsi gəlir və rəsmi Moskvanın bu işçi qüvvəsinə ehtiyacı var”.
Politoloq qeyd edir ki, “Krokus Siti Hall”da baş verən terror aktı, eləcə də digər bənzər hadisələrin arxasından həm də ölkədəki miqrantlar çıxdığı üçün sözügedən tədbirlərin görülməsi əsas şərtə çevrilib:
“Terror hadisələrinin qarşısını almaq üçün Rusiya bu gün miqrantlarla bağlı mühüm tədbirlər görür. Vladimir Putin çıxışlarının birində qeyd etmişdi ki, ölkəyə gələn miqrantlar rus dilini bilməli, rus mədəniyyətindən anlayışı olmalı, professional şəkildə işlərinin öhdəsindən gəlməlidirlər. Çünki Rusiyanın inkişaf etməsi üçün ölkəyə yeni beyin axını zəruridir”.
Qeyd edək ki, Rusiyanın sözügedən tələbi bu ölkədəki azərbaycanlılar tərəfindən də narahatlıqla izlənir. Onlar Azərbaycana gəlib yenidən Rusiyaya qayıdanda müəyyən problemlərlə üzləşə bilərlər. Buna görə də soydaşlarımızın yeni qaydalara uyğun addımlar atmaları tövsiyə olunur.
