Sərhəd kəndə gələn avtomobillərdə 6 nəfər mülki geyimli şəxs olub. Onların Fransanın kəşfiyyat orqanlarının əməkdaşları olduğu da istisna edilmir.
Fransanın bu addımı nədən xəbər verir? Gələcəkdə bizi hansı təhlükələr gözləyir?
Məsələ ilə bağlı Modern.az-a danışan Milli Məclisin deputatı Naqif Həmzəyev bildirib ki, Fransa artıq proseslərin arxasında olduğunu açıq göstərmək istəyir:
"Fəaliyyəti Azərbaycanla razılaşdırılmayan, razılığımız olmadan şərti Azərbaycan-Ermənistan sərhədində müşahidə missiyası adı altında yerləşdirilmiş Avropa İttifaqına məxsus bu qrup çox təəssüflər olsun ki, öz mandatına uyğun olmayan işlərlə məşğuldur. Bu missiya faktiki olaraq Ermənistanın mövqelərini gücləndirmək və gələcəkdə Ermənistanın yenidən təxribatlar törətməsi üçün zəmin yaratmağa xidmət edir. Heç kəsə sirr deyil ki, müşahidə missiyası adı altında buraya gətirilən şəxslər keçmiş kəşfiyyatçı və hərbçilərdir. Onlar şərti sərhəddə mütəmadi müşahidələr aparırlar və Azərbyacan tərəfini nəzarətdə saxlayırlar. Dağıdılmış və məhv olunmuş Ermənistan ordusunun yenidən formalaşdırılması və gücləndirilməsi, zərurət yaranacağı halda şərti sərhəddə təxribatlar yaratmaq üçün ona lazımi təlimatlar keçirlər. Bütün bu proseslərdə Fransadan olan keçmiş həbçilər və kəşfiyyatçılar iştirak edirlər. Baş verənlərə Fransa səfirliyinin tam nəzarət etdiyi heç kimə sirr deyil. Növbəti müşahidə zamanı artıq Fransa bayraqları ilə avtomobillərin görünməsi Fransanın fəaliyyətini gizlətmədiyindən, bütün prosesləri idarə edən olduğunu göstərmək istəyindən xəbər verir".
N.Həmzəyev vurğulayıb ki, missiyanın fəaliyyətinin dayandırılmasına ehtiyac var:
"İlk gündən olduğu kimi bu gün də missiyanın fəaliyyətini qəbul etmirik. Çünki bu missiyanın fəaliyyətinə ehtiyac yoxdur. Amma görünür ki, Ermənistan Avropa İttifaqından və Qərbdəki havadarlarından daha çox vəsait ala bilmək və öz ordusunu onların dəstəyi ilə yenidən qurmaq, gücləndirmək üçün missiyanı bura gətirib. Onların fərqli planları da vardı. Həmin planların hər birini Azərbaycan alt-üst etdi. Bu gün də onlar yeni oyun arxasınca qaçırlar. Azərbaycanı təxribata çəkmək istəyirlər. Hətta Ermənistan ordusunu silahlandırmaq, ona uzaqmənzilli raketlər peşkəş çəkərək Cənubi Qafqazda yeni münaqişə ocağı yaratmaq, çox kövrək olan Ermənistan-Azərbaycan münasibətlərini sülhə ən yaxın olduğumumz dövrdə zəiflətmək, demək olar ki, pozmaq istəyirlər. Amma istənilən halda onların öz istəklərinə nail olacaqlarına inanmıram. Çünki Azərbaycan yeni reallıq yaradıb.
Cənab Prezident İlham Əliyevin rəhbərliyi altında Azərbaycan Ordusu elə gücə malikdir ki, nəinki Ermənistan, ümumiyyətlə, hansısa kənar güclərin cəsarəti çatıb Azərbaycanla güc və təhdid dili ilə danışa bilməz. Bu fəaliyyətlərin heç bir nəticəsi olmayacaq. Azərbaycan növbəti təxribatların da qarşısını məharətlə alacaq. İnşallah Ermənisan da haqq yoluna gələcək və Azərbaycanın irəli sürdüyü sülh şərtləri əsasında sülh müqaviləsinin imzalanmasına töhfə verəcək".
