Təcrübəli türk diplomat, səfir Firudin Sinirlioğlunun ATƏT-in yeni baş katibi seçilməsi bir neçə aspektdən önəm dəyərləndirilir. Onun Qərb-Azərbaycan münasibətlərinə, eləcə də Bakı-İrəvan təmaslarına hansı formada təsir edəcəyi maraq doğuran məsələlərdəndir.

Kainat.tv xəbər verir ki, Globalinfo.az-a danışan keçmiş xarici işlər naziri Elmar Məmmədyarov ATƏT-in yeni baş katibi Firudin Sinirlioğlunu yaxşı tanıdığını bildirib:

“90-cı illərdə onunla Nyu-Yorkda birlikdə işləmişik. Çox pozitiv insan, həmçinin tanınmış diplomat, siyasətçidir. Belə mühüm bir vəzifəyə türkəsilli bir şəxsin təyin edilməsi önəmlidir. Hesab edirəm, bu təyinat həm ATƏT, həm də Türkiyə üçün müsbət hadisədir”.

E.Məmmədyarov ATƏT və Aİ-dəki dəyişikliklərin mövcud Qərb-Azərbaycan soyuqluğuna təsirindən danışıb:

“Bu, mümkündür. Baş katibdən çox şey asılıdır, lakin hər şey yox. Rəsmi Bakının gözləntiləri var. Məsələn, ATƏT-in Minsk qrupu ləğv edilməlidir. Məntiqlə Qarabağ münaqişəsi həll olunub, bu quruma ehtiyac yoxdur. Yəqin ki, baş katib bu məsələdə addımlar atacaq. Bununla belə, ATƏT-də qərarlar konsensusla qəbul olunur. İlk növbədə, Ermənistan da buna razılıq verməlidir. Bu istiqamətdə proseslərin sürətlənməsi mümkündür”.