Kainat.tv xəbər verir ki, bu fikirləri Globalinfo.az-a açıqlamasında politoloq Elxan Şahinoğlu deyib.
Onun sözlərinə görə, bu məsələdən ən çox əziyyət çəkən Azərbaycandır:
“Ölkəmizdən İran ərazisinə narkotik keçirilməsi faktı yoxdur. Əksinə bu ölkədən gizli yollarla Azərbaycana on kiloqramlarla narkotik vasitələri keçirilməyə çalışılır. Narkotiki daşıyanlarla Azərbaycan sərhədçiləri arasında baş verən atışmalar nəticəsində hərbçilərimiz yaralanır, həlak olur. Buna görə də birgə hərbi təlimlər Azərbaycan sərhədçiləri ilə İran sərhədçiləri arasında əməkdaşlığın artırılmasına xidmət etməlidir.
Bu hərbi təlimlərin siyasi əhəmiyyəti də var. İrandakı siyasi, dini və hərbi dairələr Azərbaycanı İsraillə hərbi əməkdaşlığı genişləndirməkdə ittiham edirlər. Halbuki, Bakının Təl-Əvivlə əməkdaşlığı Tehrana qarşı yönəlməyib. Azərbaycanın həmçinin strateji müttəfiqi Türkiyə ilə il ərzində keçirdiyi hərbi təlimlərdən də narahat olanlar var. Azərbaycan bu hərbi təlimlərdə iştirak etməklə qonşu ölkəyə təhdid olmayacağını Tehrana izah etməyə çalışır”.
Elxan Şahinoğlu
Politoloq bildirib ki, İran Azərbaycanın Türkiyə, İsrail və NATO ilə hərbi əməkdaşlıqdan imtina etməyəcəyini anlamalıdır:
“Məsələn, Azərbaycan silahlı qüvvələri İran İslam İnqilabı Keşikçiləri Korpusu (SEPAH) ilə təlim keçirərkən NATO nümayəndə heyəti Bakıda idi. Bakıda Azərbaycanın NATO-nun Sülh Naminə Tərəfdaşlıq Proqramına qoşulmasının 30 illiyinə həsr olunmuş elmi-praktik konfrans təşkil olundu. Görüşlərdə alyansla əməkdaşlığın əsas hüquqi bazası hesab olunan “Fərdi uyğunlaşdırılmış tərəfdaşlıq proqramı” (ITPP) layihəsində göstərilən öhdəliklərin icrası ilə bağlı cari vəziyyət və beynəlxalq təhlükəsizlik missiyalarında hərbi qulluqçularımızın iştirakı barədə danışılıb. Azərbaycan NATO-ya üzv olmaq istəmir, ancaq ordumuzun daha da modernləşdirilməsi baxımdan Şimali Atlantika Blokunun müxtəlif proqramlarında iştirak ölkəmiz üçün əvvəlkitək faydalıdır”.
