Ötən ay 201 nömrəli tam orta məktəbin direktoru Afaq Əliyevanın səsi yazısı yayılmışdı. Səs yazısında direktor məktəbin müəllimi Lalə Şəfaqətovanı keçmiş direktor müavini Svetlana Hüeynovaya qarşı yalançı şahidlik etməyə məcbur edirdi.

Musavat.com xəbər verir ki, bu səs yazısı yayıldıqdan sonra Bakı Şəhər Təhsil İdarəsi açıqlama vermişdi ki, məsələ ilə bağlı araşdırma aparılacaq.

Həmin açıqlamada deyilirdi: "Nəticəsi barədə ictimaiyyətə məlumat veriləcək. Məktəbin və müəllimin fəaliyyətinə uyğun olmayan hallara qarşı qanunvericiliyin tələbləri çərçivəsində müvafiq tədbirlərin görülməsi diqqət mərkəzində saxlanılır".

Həmin qalmaqallı hadisədən tam bir ay keçib. Amma araşdırmanın nəticəsi ilə bağlı məlumat yoxdur.

Bakı Şəhər Təhsil İdarəsinə ünvanladığımız növbəti sorğuya cavab olaraq yenə də “araşdırma aparılır” cavabını aldıq...

Direktorun səs yazısı hansı qalmaqaldan sonra yayılmışdı?

Məlumata görə məktəbin kollektivi arasında uzun müddətdir davam edən ədavət var imiş. Məktəbin keçmiş direktor müavini Svetlana Hüseynova ilə məktəbin direktoru arasında uzun müddət problemlər olub. Bunun nəticəsi olaraq təlim-tərbiyə işləri üzrə direktor müavini və riyaziyyat müəllimi vəzifəsində işləmiş Svetlana Hüseynova işdən çıxarılıb.

Məlumata görə Svetlana Hüseynova işdən çıxarılmadan öncə məktəbdəki özbaşınalıqla bağlı narazılığını bildirib və rəsmi qurumlara bu barədə məlumat verib. Bundan sonra direktorla “düşmən” olub.

Svetlana Hüseynova işdən çıxarılmadan əvvəl pedoqoji şuranın iclası keçirilib. İclasda çıxış edən direktor Afaq Əliyeva çıxışında Svetlana Hüseynovanı nəzərdə tutaraq,- “adam yediyi qaba tüpürməz”, deyib. Ardınca isə o, üzünü kollektivə tutaraq “adam kimdir?” deyə sual ünvanlayıb. Bu zaman zalda olan direktorun digər müavini Elnurə Ramazanova direktoru müdafiə edərək onun sualının cavabına “şərəfsizdir” deyərək reaksiya verib. Pedoqoji şurada vəziyyət gərginləşib və tərəflər bir-birinin ünvanına ağır ifadələr işlədiblər. Elnurə Ramazanova “şərəfsiz” deyərkən Svetlana Hüseynovanı nəzərdə tutub.

Elnurə Ramazanova mübahisə zamanı Svetlana Hüseynovaya “sən valideynlərdən pul almısan, rüşvət almısan, bu gün də pul alırsan" deyib. Bunları böhtan və şərəfinin alçaldılması kimi qiymətləndirən Svetlana Hüseynova məhkəməyə üz tutub.

Həmin ərəfədə Svetlana Hüseynova işdən çıxarılıb. Svetlana Hüseynova Elnurə Ramazanovanı xüsusi ittiham qaydasında məhkəməyə verərək cəzalandırılmasını istəyib.

Svetlana Hüseynova iddia ərizəsində bunları qeyd edib: “Elnurə Ramazanova əlinə imkan düşən kimi yazılı və ya şifahi şəkildə mənim şərəf və ləyaqətimi, nüfuzumu ləkələməyə, alçaltmağa çalışıb. Bakı Şəhər Təhsil İdarəsinə, məktəbin direktoruna barəmdə böhtan xarakterli müraciətlər edib. Valideynlər və müəllimlər arasında şayiələr yayıb. Barəmdə mənfi rəy formalaşdırıb. Onun müraciətləri araşdırılıb və əsassız olduğu məlum olub. Amma mənim etdiyim şikayətlər yalan, şər-böhtan deyil”.

Məhkəmə araşdırması zamanı Elnurə Ramazanovanın şikayətçi Svetlana Hüseynovaya “şərəfsiz”, “rüşvətxor” deməsini təsdiq edən müəllimlər də şahid kimi dindirilib. Həmçinin Elnurə Ramazanovanın dediklərini sübut edən səsyazısı da məhkəmədə sübut kimi qiymətləndirilib.

Cinayət Məcəlləsinin 147.2 (Ağır və ya xüsusilə ağır cinayətdə ittiham etməklə böhtan atma) və 148-ci (təhqir) maddələri ilə təqsirli bilinən Elnurə Ramazanova cəzalandırılıb. O, Cinayət Məcəlləsinin 148-ci maddəsi ilə 1000 manat məbləğində cərimə cəzasına, 147.2-ci maddəsi ilə hər ay qazancından dövlət nəfinə 10% məbləğində pul tutulmaqla 1 il müddətinə islah işləri cəzasına məhkum edilib.
Kainat.tv