Sabunçu rayonu Maştağa qəsəbəsi, Xanlar yaşayış massivində yaşayan Ariz Pənah oğlu Abbasov tərəfindən Kainat.tv-yə müraciət ünvanlanıb.

Azərbaycan Respublikasının I Vitse Prezidenti Mehriban xanım Əliyevaya Bakı şəhəri, Sabunçu rayonu, Maştağa qəsəbəsi, Xanlar yaşayış massivində yaşayan Ariz Pənah oğlu Abbasov tərəfindən yazılan İmdad məktubunu olduğu kimi təqdim edirik:

"Çox hörmətli Mehriban xanım! Bu müraciətimlə bildirirəm ki, 09.09.2023-cü il tarixində həyat yoldaşım Abbasova Elvira Ceyhun qızı qəflətən hər iki gözünün görmə qabiliyyətini təmamilə itirmişdi. Həmin gündən bu günə kimi ölkə daxili bütün səhiyyə müəssisələrinin müayinə və müalicəsini götürməyimizə baxmayaraq, zərrə qədər də olsun yoldaşımın səhhətində irəliləyiş yoxdu. Özüm də II qrup əliləm. Biz bir gənc ailə olaraq Sizə sığınıb, Sizə səslənirik. Hörmətli Mehriban xanım! Çoxsaylı həkimlərin məsləhətinə görə belə bir xəstəliyin qismən də olsa, çarəsi Almaniya Heidelberq Universiteti Klinikasında mövcuddur. Hörmətli Mehriban xanım, həmin ünvana getməyə biz maddi çətinlik çəkirik. Özüm səhhətimlə bağlı heç bir yerdə işləmirəm. Ailəmizin tək gəlir yeri aldığımız təqaüddür. Son 2 ildir ki, bu problemlərlə bağlı xeyli müayinə və müalicə bizim maddi durumumuzu son dərəcə aşağı salıb. Hörmətli Mehriban Xanım, Sizdən bir xeyirxah insan, el anası kimi son dərəcə rica edirik ki, bütün bunları nəzərə alaraq yoldaşımın həmin klinikaya getməyinə, bir gəncin həyata öz gözləri ilə baxmağına köməklik edəsiniz. Ümidvarıq ki, səsimizə səs verəcəksiniz. Öncədən Sizə sonsuz təşəkkürümüz bildiririk...!"