Bakı şəhəri, Binəqədi rayonu, Ramazanov küçəsi, döngə 1, ev 20 A ünvanında yaşayan Nəsirova Röya Əlican qızı tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, övladı Səttərov Ruhin Məmmədnağı oğlunun həbsxanada hüquqları tapdalanır:

“Mən, Nəsirova Röya Əlican qızı, yazaraq bildirirəm ki, oğlum Qaradağ rayonu, Umbakı Penitensiar Komleksində saxlanılır. Oğlum orada işgəncələrə məruz qalır. Türmə rəisi Rauf Nəbiyev orada bütün dustaqları alçaldaraq, təhqir edir. Oğlum səhhətində yaranmış ciddi problemlə əlaqədar xəstəxanada yatmaq üçün müraciət etsə də, onun gözünün qabağında ərizəsini açıb oxuyur, daha sonra çırıb atırlar. Əslində isə dustağın məktubunu oxumağa ordakıların haqqı yoxdur.

Həkim isə ağrıkəsicidən başqa, heç bir müalicə edə bilmir. Tək mənim oğlumun yox, oradakı bütün düstaqların haqqı tapdalanır. Rəis dustaqların hər birini qorxudur ki, qırağa xəbər çıxarsanız, sizi “Tubzon”a göndərəcəm. Ora da heç bir dustaq getmək istəmir. Çünki orada işgəncələr daha çox və növbənövdür. Bunu hətta Penitensiar Xidmətin rəisi Mirsaleh Seyidov da bilir. Ona məlumdur ki, orada olan alver, özbaşınalıq bəlkə də heç bir kalonda yoxdur.

Oğlum Ruhinə 7-ci kolonda  rəis və müavin Yaşar işgəncə vermişdilər. Uşağın halını özüm gözlərimlə görmüşəm. Halbuki, ordakılar “heç nəyinin olmadığını” deyərək, öz “paqon” yoldaşlarının tərəfini saxlayırlar. Bir sözlə, “paqon” “paqon”u ələ vermir.

Dəfələrlə Mirsaleh Seyidovun qəbuluna yazılsam da, heç vaxt məni qəbul etməyib. Onun yerinə məni 11-ci kolonun rəhbər şəxslərindən olan Vəli müəllim qəbul etdi. Şikayətim əsnasında Penitensiar Xidmətin Barak müəllim adlı əməkdaşı uşağın yanına göndərildi. O da öz gözləri ilə uşağın xəsarətlərini görsə də, oğluma boş kağıza imza çəkdirib. Qalanına da yazıblar ki, “dustaqda heç bir döyülmə xəsarəti yoxdur”. Halbuki, bizi tamamilə oyuna saldılar. Uşağın zədələrini özüm görmüşəm. Bütün dustaqlara deyilir ki, ağzını açıb kiməsə nəsə desəniz başınıza oyun açılacaq.

Oğlumun vəziyyəti ağırdır, xəstəlikləri artıb. 2 aydan çoxdur ki, daxili qanaxmadan əziyyət çəkir.  5 manatlıq dərmanı həbsxananın həkimi 20 manata satır. Pul verməsən, ölməlisən. İynə vurmaq lazımdı, o da onu kimi. Yəni orada olan bahaçılıq heç yerdə yoxdur.

Oğlumun səslərini yazmışam, maraqlanan, kömək etmək istəyən bütün qurumlara təqdim edə bilərəm. O, hazırda xəstəxanada yatmalıdır, amma qərəzli şəkildə qoymurlar. Dustaqların haqları, hüquqları tapdalanır. Hara şikayət edirəmsə, ört-basdır edirlər. Alverin, rüşvətin ən pik nöqtəsi oradadır. Şampun, dərman - hər bir şey baha qiymətə satılır. Artıq bir valideyn kimi bezmişəm, nə maddi, nə də mənəvi gücüm qalmayıb. Qaradağ Rayonu Umbakı Pentensiar Xidmətində  7-ci kalonda oğlumu ölümcül döysələr də, Barak müəllimin əli ilə təmizə çıxdılar.

Onuda qeyd edim ki, uşağın elə döyüldüyünü görəndən sonra türmənin rəisi Mehman müəllimin qəbuluna girərək, şikayətimi bildirmişəm. Oda mənə dediki heç yerə şikayət etmə oğlunu bu yaxınlarda karsdan çıxartdırıb zona göndərəcəm.

Ölən dustaqların biridə mənim oğlumun olmağını istəmirəm. Xahiş  edirəm mənə kömək edin.

Həbsxananın rəisi istəmir ki, oradakı bu çirkinlər ortaya çıxsın.

Redaksiyadan: Məsələ ilə bağlı aidiyyatı qurumların mövqeyini dərc etməyə hazırıq.

Jalə FAMİLQIZI
SİAMAZ.com