İran Prezidenti Məsud Pezeşkianın bir neçə gün əvvəl Urmu gölü sahilində jurnalistlərə türk dilində müsahibə verməsi etirazlara səbəb olub.

Kainat.tv bu barədə Günaz.tv-yə istinadən xəbər verir. Məlumata görə, narazı şovinistlər bu barədə sosial media şəbəkəsində etiraz yazıları paylaşıblar. Onlar ölkənin rəsmi dövlət dilinin farsca olduğu halda, Prezidentin qeyri-fars dilində danışmasının qanuna zidd olduğunu iddia ediblər. Bu qəbildən olan etirazçılardan biri, İranın keçmiş yol və şəhərsalma naziri Abbas Axundidir.

“Hörmətli Pezeşkian, Urmiyada böyümüş və parlamentin beş dövr Təbrizdən millət vəkili olduğunuza görə, türk dilində hesabatlar almağınız sizin üçün çox normal və təbiidir, bunu başa düşürəm! Ancaq indi siz prezidentsiniz. İclaslarda ancaq fars dilində hesabatlar qəbul etməli və rəsmi dildə danışmalısınız. Sizin bu məsələyə diqqətsizliyiniz sonda millətin əlinə bəhanə vermiş olacaq. Xahiş edirəm, nəzərə alın!”-şovinist Axundi yazıb.

Qeyd edək ki, İran konstitusiyasının 15-ci maddəsinə əsasən, ölkənin rəsmi dövlət dili farsca olsa, bütün rəsmi yazışmaların bu dildə aparılması vurğulansa da, rəsmi danışıq və qeyri-rəsmi yazışmalarda qeyri-fars dillərdən istifadə qadağan edilməyib. //Musavat.com