Etirazlar fonunda bir çox xarici ölkənin, xüsusilə də Avropa İttifaqı (Aİ) üzvlərinin seçkilərin nəticəsini tanımaması diqqət çəkir. Hakim partiya isə ayrı-ayrı qanun pozuntuları qeydə alınsa da, bunun seçkinin nəticəsinə təsir edəcək səviyyədə olmadığını açıqlayıb.
Bir müddət öncə də Ermənistanda da müxalifət keşiş Baqrat Qalstanyanın rəhbərliyi ilə genişmiqyaslı aksiyalar keçirmiş, lakin heç bir nəticə əldə edə bilməmişdi.
Qonşu Gürcüstanda keçirilən kütləvi aksiyalar Cənubi Qafqaza nə vəd edir? ABŞ və Aİ gürcü müxalifətini regionu qarışdırmaq üçün ayaqlandıra bilərmi?
Kainat.tv xəbər verir ki, Globalinfo.az-a danışan deputat Elçin Mirzəbəyli deyib ki, bir sıra yerli jurnalistlər və ekspertlər hadisələrin miqyasını, həmçinin hazırda de-fakto Gürcüstanın müstəqil hüququn subyekti kimi suverenliyini təhdid etməyə çalışan qrupların potensialını reallıqdan xeyli üstün dəyərləndirirlər:
“Bəzilərinin bunu yazılarının və şərhlərinin daha çox populyarlıq qazanması baxımından etdiyini anlayıram. Amma elələri var ki, hələ də firavan və təhlükəsiz həyatın ünvanını, yaşadığımız bölgəni geosiyasi maraqlarının qanlı arenasına çevirmək istəyən Qərbdə görürlər.
Elçin Mirzəbəyli
Gürcüstanda baş verən proseslərin müəyyən bir mərhələdən sonra səngiyəcəyini düşünürəm. Çünki hazırda etirazların ön cərgəsində yer alan siyasətçilərin və vətəndaş cəmiyyəti institutlarının xeyli hissəsi Gürcüstanın ABŞ, Fransa və digər ölkələrin peykinə çevrilməsini istəmirlər. Onların seçkilərdə və hazırkı aksiyalarda iştirakı, istisnasız olaraq Qərbin sifarişlərini yerinə yetirməklə deyil, hakimiyyətə gəlmək niyyətləri ilə də bağlıdır. Məhz bu səbəbdən də proseslərin emosional yükünün getdikcə azalacağı qənaətindəyəm. Əks təqdirdə seçki gününün sonunda və növbəti gün etirazların ən sərt formasının şahidi ola bilərdik. Lakin bu, baş vermədi.
Səbəblərdən biri də Gürcü Arzusu Partiyasının real qələbəsi və müxalifətin yekdil, vahid qüvvə olmaması ilə bağlıdır. Hesab edirəm ki, sabahdan etibarən etiraz dalğasının səngiməsi prosesinə şahidlik edə bilərik”.
