Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra Suriya ilə bağlı fərqli tonda danışdı, “Bir gecə qəfil gələ bilərik” mesajını verdi. Ərdoğan Suriyadakı inqilabdan sonra ilk dəfə dəyənəyin ucunu göstərməyə ehtiyac duydu.

Kainat.tv xəbər verir ki, bu barədə “Hürriyət” yazır.

Nəşr xatırladır ki, Ərdoğan sonuncu dəfə ABŞ-nin Türkiyəyə qarşı qızışdırdığı Yunanıstana belə bir xəbərdarlıq etmişdi:
“Ərdoğanın “Bir gecə qəfil gələ bilərik” mesajı Afinada həyəcan təbilinin çalınmasına səbəb olmuşdu. Yunanıstan yola gəldi. ABŞ-nin verdiyi qazla heç yerə gedə bilməyəcəyini gördü. İndi Yunanıstanla münasibətlər müsbət səviyyədə inkişaf edir”.

Mənbə vurğulayır ki, Suriyanın yeni rəhbərliyi PKK-YPG terror təşkilatı və ölkədəki digər silahlı qruplaşmaların ləğvi qərarını verib:
“Həmin qərara görə, Suriyada rəsmi ordudan başqa heç bir silahlı qüvvə olmamalıdır. Suriyadakı digər qüvvələr silahlarını yerə qoymaq qərarına gəliblər. Amma PKK-YPG hələ də danışıqları davam etdirir. İndiyə qədər döymədikləri qapı qalmayıb. Rusiyadan Türkiyə ilə aralarında vasitəçi olmasını istəyiblər, ABŞ-nin Ayn əl-Ərəbdə baza qurması yalanını uydurublar, İran və İsraillə təmasa keçiblər, Fransa və Almaniyaya üz tutublar, Suriya rəhbərliyi ilə görüşüblər. Suriya rəhbərliyi özünü saxlamaq istəyən terror təşkilatının bütün təkliflərini rədd edib. Dəməşq silahlarını yerə qoymaqdan başqa heç bir variantla razılaşmayıb”.

“Hürriyət” bildirir ki, Türkiyə Suriya ilə bağlı məsələdə nüfuzlu bir ölkə idi, amma rejim dəyişikliyindən sonra daha da güclənib:

“Türkiyə meydanda və masa arxasındadır. Trampın dediyi kimi, Suriyanın açarı Türkiyənin əlindədir. Suriya rəhbərliyi də PKK-YPG-nin öz ərazisində olmasını istəmir. Suriyada PKK-YPG varlığı həm Türkiyə, həm də yeni Suriya rəhbərliyinin qırmızı xəttidir”.

Ərdoğanın “Bir gecə qəfil gələ bilərik” açıqlamasına gəlincə, nəşr vurğulayır ki, bu sözlərin hədəfi PKK-YPG-ni qorumağa çalışan Qərb və region ölkələridir:

“İran, Fransa və Almaniya da daxil olmaqla, Suriya ilə bağlı hesab aparan ölkələrin Ərdoğanın hər cümləsini diqqətlə təhlil etməsi faydalı olardı.
Ərdoğan xəbərdarlığını edib: "PKK-YPG silahı yerə qoymasa, Suriyada fərqli idarəçilikdə israr etməyə davam edərsə, Qərb dövlətləri bu istiqamətdə tələblər irəli sürərsə, Suriya dövləti ilə birgə genişmiqyaslı hərbi əməliyyat qaçılmaz olacaq.

Bütün bu mübarizə PKK-YPG varlığını davam etdirməsi üçün aparılmayıb. Ankara indi A planını həyata keçirir, amma B planı da masadadır”. //Teleqraf.com