Təxminən 4 illik fasilədən sonra Suriyada vətəndaş müharibəsi yenidən alovlandı. Eyni zamanda Gürcüstanda avrointeqrasiya tərəfdarlarının hökumətə qarşı keçirdiyi aksiyalar da getdikcə şiddətlənir. Etirazçılar geri çəkilməyəcəklərini bildirir və polislə qarşıdurmaya girirlər. İran isə bir tərəfdən Suriyaya yardım edir, digər tərəfdən İsraillə gərginlik içərisindədir.
Qonşu ölkələrdəki vəziyyət Türkiyəyə necə təsir göstərəcək? Ankara bu cür böhranlı situasiyanı lehinə çevirə biləcəkmi?
Kainat.tv xəbər verir ki, Globalinfo.az-a danışan politoloq Fərid Şəfiyev deyib ki, Gürcüstanda baş verənlərin Türkiyə üçün heç bir təhlükəli tərəfi yoxdur:
“Tbilisidə yaşananlar bu və ya başqa formada Türkiyəyə təsir etmir. Lakin son hadisələr göstərdi ki, Ankara Suriyada istəyinə nail ola bilir. Yəni Türkiyənin Yaxın Şərqdə, həmçinin bu ölkədə yetərli qədər gücü, təsir mexanizmləri var.
İrana gəldikdə isə, şübhəsiz, Suriyada baş verənlər Ankara ilə Tehranı üz-üzə qoyur. Bu isə istənilən halda gərginliyə səbəb olacaq. Çünki iki ölkənin fərqli maraqları var. Yəni İranla Türkiyə hər hansı razılığa gəlsə belə, bu, qısamüddətli olacaq”.
Fərid Şəfiyev
Politoloqun sözlərinə görə, İranın istər Suriyada, istərsə də ümumilikdə Yaxın Şərqdə maraqları fərqlidir:
“Eyni şeyi Rusiya üçün də demək olar. Lakin görünən odur ki, Moskva ilə Ankara arasında kompromis, ya da bir razılıq var. Çünki Kreml proseslərə Tehrandan fərqli olaraq təmkinli yanaşır.
Ankara ilə Moskva yekunda bir razılığa gələ bilərlər. Məsələ ondadır ki, Kreml üçün Suriya Prezidenti Bəşər Əsədin hakimiyyətdə qalması prioritet məsələdir. Türkiyə isə ölkənin şimalının PKK, YPG, PYD-dən təmizlənməsini istəyir. Bu istiqamətdə bir razılıq olarsa, proseslər səngiyə bilər”.
