Səbail rayon İcra Hakimiyyətinin əməkdaşları Qarabağ qazisi, şəhid ailəsinin evini başına uçurub. Bu haqda zərərçəkən dağıdılmış yarımtikilidə şikayət xarakterli video çəkərək məsələni ictimailəşdirib. Ad və soyadını bildirməyən qazi qardaşının Qarabağ uğurunda gedən döyüşlərdə qəhrəmancasına şəhid olduğunu, özünün isə 3 il müharibədə iştirak etdiyini söyləyib: “Şəhid ailələrinə verilən 11 min manatla Səbail rayonunda ev tikirdim. Bu evi tikmək üçün üçün İcra nümayəndələri məndən 1000 manat pul istədilər, verdim. Sonra gəlib, 2 min manat da tələb etdilər. Pul ala bilmədikdə isə evimi başıma uçurdular”.
Məsələyə münasibət bildirən Qarabağ Azadlıq Təşkilatının (QAT) sədri Akif Nağı “Sherg.az”a söyləyib ki, Səbail rayon İcra Hakimiyyəti vicdansızlıq edib:
“Vaxtaşırı bu cür xəbərlər sosial mediada, mətbuatda yayılır. Bunlar həqiqətən də üzücü xəbərlərdir. Məmurlar başa düşmək istəmirlər ki, bu insanlar şəhid ailəsidir, qazidir.
Bu adam vətən uğurunda canını qoyub. Bu cür məsələlərdə həmin insan qanunsuz ev tiksə belə ona müəyyən güzəştlər edilməli idi. Qazi, şəhid qardaşı nə edir ki? Ev tikir. Bu cür insanlara dövlət ev verir. Belə insanlardan nə istəyirlər? Tamah o insanların gözlərini tutub, puldan başqa heç nə görmürlər. Səbail rayon ərazisində torpaq bahadır.
Onu kiməsə satıb, pulunu yeməkmi istəyirlər? Nə üçün belə vicdansızlıq edirlər? Bu məsələyə dövlət səviyyəsində münasibət bildirilməlidir. Həmin məmurlar da cəzalandırılmalıdır. Çünki onlar bu hərəkətləri ilə dövlətə zərər verirlər. Insanları dövlətdən narazı salırlar. Dəfələrlə belə məmurları başa salmağa çalışmışıq ki, bu insanları adam kimi qəbul edin.
Onların şikayətlərini dinləyib, kömək edin. Azərbaycanda çox təhlükəli məmur dəstəsi yaranıb. Onlar Azərbaycan dövlətinin maraqlarına zərbə vururlar. Ona görə bu kimi hadisələr Azərbaycan rəhbərliyinin nəzarəti altında olmalıdır. Qanunsuz hərəkət edən məmurlar dərhal cəzalandırılmalıdırlar”.
Kainat.tv
Saytda axtar
Redaktor seçimi
