ABŞ və İsrailin İrana qarşı həyata keçirdiyi hərbi əməliyyatlardan sonra qlobal maliyyə bazarlarında ciddi dalğalanma müşahidə olunur. Geosiyasi gərginliyin artması fonunda investorlar ənənəvi “təhlükəsiz liman” sayılan qiymətli metallara üz tutublar. Bazar məlumatlarına görə, ons qızıl erkən saatlarda 5 393 dollara qədər yüksəlib. Hazırda isə qızılın qiyməti cümə günü ilə müqayisədə 1,9 faiz artaraq 5 363 dollar/ons səviyyəsində ticarət olunur.

Kainat.tv Musavat.com-a istinadən bildirir ki, analitiklər bunu riskli aktivlərdən çıxış və qoruyucu investisiya alətlərinə yönəli kütləvi axınla əlaqələndirirlər.

Gümüş bazarında da artım qeydə alınıb. Belə ki, gümüşün unsiyası 0,7 faiz bahalaşaraq 94,49 dollar səviyyəsinə yüksəlib.

Mütəxəssislər bildirirlər ki, Yaxın Şərqdəki gərginlik qısa müddətdə maliyyə bazarlarında sərt dalğalanmalara səbəb ola bilər. Xüsusilə enerji qiymətləri, valyuta bazarları və fond indekslərində qeyri-sabitliyin artacağı istisna edilmir.

Ekspertlərin fikrincə, hazırkı vəziyyət bir daha göstərir ki, geosiyasi risklər qlobal iqtisadi sistemə birbaşa təsir göstərir və investor davranışını sürətlə dəyişir. Gərginliyin davam etməsi halında qiymətli metallara tələbin daha da arta biləcəyi ehtimal olunur.