Saray qəsəbə sakini Hacıyev Əlikram Əli oğlu tərəfindən Hurriyyet.az saytının redaksiyasına şikayət məktubu daxil olub. Şikayətçinin redaksiyamıza göndərdiyi məktubu olduğu kimi dərc edirik:

“Mən, Hacıyev Əlikram Əli oğlu, yazaraq xahiş edriəm ki, məktubumu ictimailəşdirəsiniz.

20.06.2025-ci il tarixində həyat yoldaşım Hacıyeva Elmira Alıməmməd qızını öz ayağı ilə “Medera Hospital”a apardıq. Orada bildirildi ki, təcili əməliyyat olunmalıdır, ürəyinə stent qoyulacaq.

Əməliyyatdan sonra həyat yoldaşımın vəziyyəti qəfil pisləşdi. Həkimlər bizi təcili olaraq xəstəxanadan çıxarmağa məcbur etdilər və açıq əməliyyat lazım olduğunu dedilər.

Həmin vaxtın çarəsizliyini izah etmək olmaz. Əlavə olaraq 1000 manat da ödəniş etməli olduğumuzu bildirdilər.

Daha sonra yoldaşım Badamdar qəsəbəsində yerləşən DTX xəstəxanasına köçürüldü. Xəstəxanaya çatan kimi 350 manat ödəniş tələb edildi. Ödənişi edib, biraz dincəlmək üçün evə qayıtdıq.

Təxminən 2 saat sonra bizə zəng edərək bildirdilər ki, xəstənin vəziyyəti ağırdır və onu aparata qoşublar. Bizə xəstə ilə danışmağa imkan vermədilər.

Bir müddət sonra isə xəstənin vəfat etdiyini bildirdilər.

30.06.2025-ci il tarixində ölüm haqqında arayış almaq üçün xəstəxanaya gedəndə arayışı vermədilər. Bildirdilər ki, 3 min manat borcunuz var, ödənilməlidir.

Beləliklə, öz ayağı ilə xəstəxanaya gedən yoldaşımın cansız bədənini verdilər mənə. Bu azmış kimi, 3 min manat pul da istədilər.

Bu olanlar məni və ailə üzvlərimi dərindən sarsıtdı. Hesab edirik ki, həm tibbi səhlənkarlıq, həm də hüquqlarımızın pozulması baş verib. Aidiyyəti orqanlardan bu məsələ ilə bağlı ciddi şəkildə araşdırma aparılmasını və günahkarların məsuliyyətə cəlb olunmasını xahiş edirik".

Jalə FAMİLQIZI

Redaksiyadan:Yazıda adı çəkilən qurumların mövqeyini dərc etməyə hazırıq.


Kainat.tv