Bolonya Universitetində beynəlxalq hüquq ixtisası üzrə təhsil alan azərbaycanlı tələbə Mahmud Bayramov, beynəlxalq miqyaslı hüquq turnirində misilsiz uğura imza atıb. O, komandası ilə birlikdə Haaqada keçirilən nüfuzlu Universitetlərarası Beynəlxalq Hüquq Debat Turnirində iştirak edərək, dünya çempionu titulunu qazanıb.
Sözügedən turnir beynəlxalq hüquq sahəsində dünyanın ən seçmə universitetlərinin tələbələrinin iştirakı ilə keçirilir və debat mədəniyyəti, hüquqi biliklərin tətbiqi, analitik düşüncə və arqumentasiya bacarıqları ilə seçilir. Mahmud Bayramov bu yarışda Bolonya Universitetinin rəsmi nümayəndəsi və debat komandasının baş spikeri kimi çıxış edib.
Bu hadisə təkcə fərdi uğur deyil, eyni zamanda Bolonya Universiteti üçün də tarixi nailiyyət hesab olunur. Belə ki, universitet bu turnirdə indiyə qədər yalnız 1/8 final mərhələsinə qədər irəliləyə bilmişdi. Mahmud Bayramovun komandası isə bu ənənəni qıraraq 1/4 final, yarımfinal və nəhayət final mərhələlərinə qədər yüksəlib. Finalda da qələbə qazanan komanda turnirin bütün əsas göstəricilərini yeniləyərək, adını yarışın tarixinə qızıl hərflərlə yazdırıb.
Mahmud Bayramovun bu uğuru həm Azərbaycan tələbələrinin beynəlxalq miqyasda rəqabətə davamlı olduğunu sübut edir, həm də ölkəmizin gənc hüquqşünaslarının gələcəkdə beynəlxalq tribunlarda söz sahibi ola biləcəyinin göstəricisidir.
Hazırda Mahmud Bayramov təhsilini Bolonya Universitetində davam etdirməklə yanaşı, beynəlxalq hüquq sahəsində tədqiqatlar aparır və müxtəlif hüquqi forumlarda aktiv iştirak edir.
24 saat

Kainat.tv