Saatlıda qəzaya səbəb olan təcili yardım sürücüsü həbs edilib. Buna səbəb qəza zamanı zərərçəkmişlərdən birinin dünyasını dəyişməsi, 3 nəfərin də yaralanması olub. İstintaqla müəyyən edilib ki, qəzaya səbəb təcili yardımın sürücüsü olub.

Musavat.com xəbər verir ki, təcili yardımın sürücüsü 57 yaşlı Daşqın.A olub.

Hadisə Saatlı rayonunun, Əhmədbəyli kəndi ərazisində baş verib. Təcili yardım maşını ilə Eldost Ələkbərovun idarə etdiyi “Hyundai” markalı maşın toqquşub. Hadisə ilə bağlı cinayət işi açılıb və təqsirli olaraq təcili yardımın sürücüsü Daşqın.A göstərilib. Onun cinayət işi üzrə məhkəmə iclası Saatlı Rayon Məhkəməsində baş tutub.

Daşqın A. hadisə günü yaşananları məhkəmədə danışıb. Deyib ki, 1989-cu ildən Saatlı Rayon Mərkəzi Xəstəxanasının Təcili Yardım şöbəsində sürücü işləyib.

Həmin gün növbətçi həkim İbrahimin Cəlilovun göstərişi ilə “Fiat Doblo” markalı avtomobillə çağırış ünvanına gediblər:
“Hadisə yerinə çatanda “Qazel” markalı avtomobildən Rəhibə, Aysun və Əfsanə adlı xanımlar endi. Rəhibənin epilepsiyası var idi. Həkim yaralını xəstəxanaya təxliyə edəcəyimizi dedi. Rəhibənin yanında olan qadınların köməyi ilə Rəhibəni xərəyə uzatdıq. Rəhibə tək getmək istəmədi. Sonradan bildiyim qaynı arvadı olan Əfsanənin də yanında gəlməsini istədi. Rəhibə qızının da maşına minməsini istədi. Qızı Aysun da maşını mindi”.
Təcili yardım yolda olan zaman “Hyundai” markalı avtomobillə toqquşub. Daşqın.A qəzaya səbəb kimi “Hyundai” markalı maşının sürücüsünü göstərib:
“Biz qəzaya düşəndən sonra təcili yardım gəlib yaralıları xəstəxanaya apardı. Mənim də qanaxmam var idi. Mən də xəstəxanaya getdim. Həmin zaman hadisə yerinə polis əməkdaşları gəlməmişdi. Mən xəstəxanadan qayıdanda tam fərqli mənzərə gördüm. “Hyundai”nin nömrəsi açılmışdı. Həm də yolun kənarına çəkilmişdi. Hadisə vaxtı “Hyundai”nin sürücüsünün atası Azər Ələkbərov mənim atama “burada heç nə yoxdu. Şikayət olmasın, özümüz həll edərik” deyib.
“Hyundai” 140-150 km/saat sürətlə gəlirdi. Hadisə yerinə baxış keçirilənə qədər artıq avtomobillərin yeri dəyişdirilmişdi. Hadisə mənim idarə etdiyim avtomobilin yolunda olmuşdu. Amma mənim maşınımı çəkərək əks yola gətirmişdilər. “Hyundai”ni də kənara çəkmişdilər. Toqquşma yeri səhv idi. Buna görə hadisə yerinə baxış keçirilməsi haqqında protokola imza etmədim”.
Daşqın A. ifadəsində hadisə zamanı təcili yardım maşınında xüsusi sayrışan işıq və səs siqnallarının işlək olduğunu deyib. Bildirib ki, toqquşma zamanı səs siqnalları sönüb. İşığı da orada olan Ravil Gözəlov adlı şəxs söndürüb.
Daşqın A. deyib ki, atası və digər qohumları dəfələrlə maddi kömək göstərilməsi üçün mərhum Rəhibənin ailə üzvlərinə müraciət edib. Amma müsbət cavab ala bilməyiblər.
Mərhumun əri Nuruşov məhkəmədə dindirilən zaman bunları deyib: “Maddi çətinliyə görə yoldaşım kənddən bəzi qadınlarla əkin sahələrində alaq təmizləməyə gedirdi. Onları adətən atam Soltanəli Nuruşov digər kənd qadınları ilə birlikdə öz “Qazel”i ilə aparırdı. Qızım Aysun da anası hara gedərsə ondan ayrı qalmırdı. Yolda Rəhibənin epilepsiyası tutub. Təcili yardım çağırıblar. Təcili yardımla xəstəxanaya gedəndə yolda qəzaya düşüblər.
Qəzanı eşidən zaman xəstəxanaya getdik. Rahibənin vəziyyəti ağır olduğu üçün Bakıya apardılar. Bakıda bilindi ki, boynu sınıb. Həkimlər dedi ki, 5-6 saat sonra dünyasını dəyişəcək. Biz də evə gətirdik. Qohum-qonşular evə yığışdı. Bir neçə saat sonra Rəhibə vəfat etdi”.
Mərhumun əri “Hyundai” sürücüsündən yox, təcili yardım sürücüsündən şikayətçi olduğunu, ona cəza verilməsini istəyib.
Hadisə zamanı təcili yardımda olan həkim İbrahim M. bildirib ki, sürücü Daşqının sayrışan işıq siqnalını yandırıb-yandırmadığını bilməyib: “Ona fikir vermədim. Amma dəqiq bilirəm ki, səs siqnalı yanmırdı. Mənim heç kimdən şikayətim yoxdur”.
Məhkəmədə təcili yardımda olmuş feldşer Cavid Ələkbərov da ifadə verib. Həkim mərhumun təcili yardımda xərəyə niyə bağlanmadığı sualına da cavab verib:
“Rəhibənin ürəyi bulandığı üçün hər an qusa bilərdi. Buna görə kəmərlə onu xərəyə bağlamadıq. Çünki qusuntu kütləsi onu boğa bilərdi. Əgər xəstə infakt keçiribsə, ürəyi bulanırsa və ya epilepsiya keçirirsə xərəyə bağlanmır.
Mən arxada oturduğum üçün toqquşmanı görmədim. Hərəkətdə olan zaman səs siqnalından istifadə edilməmişdi. Əgər səs siqnalı istifadə edilsəydi bunu eşidərdim”.
Qəzada iştirak edən digər avtomobilin sürücüsü Eldost Ələkbərov isə dindirilən zaman məlum olub ki, sürücülük vəsiqəsi yox imiş.

O, Saatlı Rayon Polis Şöbəsinin İstintaq bölməsinin müstəntiqi vəzifəsində çalışır. E.Ələkbərov günahkar kimi təcili yardımın sürücüsün göstərib:
“Mən 50 km/saat sürətlə hərəkət edirdim. Qarşı tərəfdən gələn təcili yardım sürətli idi və yoluma çıxdı”.
E.Ələkbərov qəzadan sonra avtomobillərin yerinin dəyişdirilməsi məsələsinin doğru olmadığını deyib.
Təqsirləndirilən Daşqının xeyrinə atası da ifadə verib. O, oğlunun günahsız olduğunu, hadisədən sonra maşınların yerinin dəyişdirildiyini bildirib.
Məhkəmədə dindirilən digər şahidlər isə bunu təsdiq etməyib. Məhkəmə yekunda qərara gəlib ki, Daşqın A. günahkardır və buna görə cəzalandırılmalıdır.
Hökmə əsasən Daşqın A. 5 il müddətə azadlıqdan məhrum edilib.