Xəbər verdiyimiz kimi, Prezident İlham Əliyevin sərəncamı ilə Elbrus Saleh oğlu İsayev Naxçıvan Dövlət Universitetinin rektoru təyin edilib.

Kainat.tv Elbrus İsayevin bioqrafiyasını oxucularına təqdim edir:

Elbrus İsayev 7 oktyabr 1979-cu ildə Naxçıvan şəhərində anadan olub. O, orta təhsilini Naxçıvan şəhər 11 saylı orta məktəbdə alıb. 1996–2000-ci illərdə Naxçıvan Dövlət Universitetinin Tarix-filologiya fakültəsinin Tarix müəllimliyi ixtisasında bakalavr təhsili alıb və 2000–2002-ci illərdə həmin universitetin magistratura səviyyəsini fərqlənmə diplomu ilə bitirib. Magistratura təhsili zamanı siyasi repressiyalar mövzusunda tədqiqatlar aparıb və bu istiqamətdə dissertasiya müdafiə edib.

Elbrus İsayev 1998–2001-ci illərdə Naxçıvan Dövlət Universitetinin Gənclər Təşkilatının sədri, 2001–2008-ci illərdə Tələbə Həmkarlar İttifaqı Komitəsinin sədri vəzifələrində çalışıb. Eyni zamanda, 2000–2005-ci illərdə Naxçıvan MR Dövlət Televiziya və Radio Verilişləri Komitəsində redaktor vəzifəsini yerinə yetirib.

O, 2000–2008-ci illərdə Naxçıvan Dövlət Universitetinin "Azərbaycan tarixi" kafedrasında baş müəllim, 2008-ci ildən isə "Beynəlxalq münasibətlər" kafedrasında baş müəllim kimi fəaliyyət göstərib. 2008–2012-ci illərdə universitetin Magistratura üzrə dekanı, 2013-cü ildə Naxçıvan Özəl Universitetinin "Humanitar elmlər" kafedrasının müdiri vəzifəsində çalışıb. 2014–2018-ci illərdə “Naxçıvan” Universitetinin İdarəetmə fakültəsinin dekanı və “Beynəlxalq münasibətlər” kafedrasının dosenti olub.

2018–2019-cu illərdə Naxçıvan Müəllimlər İnstitutunun rektoru təyin edilən İsayev, 2019-cu ildən etibarən Naxçıvan Dövlət Universitetinin rektoru vəzifəsini icra edir.

E. İsayev ictimai fəaliyyəti ilə yanaşı, elmi yaradıcılıqla da məşğul olub. O, Naxçıvan Dövlət Universitetinin "Azərbaycan tarixi" kafedrasının doktorantı kimi fəaliyyət göstərib və 2002–2006-cı illərdə "Böyük İpək yolu və Naxçıvan" adlı dissertasiya işini müdafiə edərək tarix üzrə fəlsəfə doktoru elmi dərəcəsini alıb.

Elbrus İsayev ABŞ, Cənubi Koreya, Malayziya, Almaniya, Rusiya, Gürcüstan, Türkiyə və İranda keçirilən bir çox beynəlxalq simpozium və konfranslarda iştirak edib. O, ingilis, rus, alman, fars, türk və koreya dillərində elmi əsərlərin müəllifidir.
Ailəlidir, iki övladı var.